Муус устарга сорохтор биэнсийэни иккитэ ылыахтара

Ыам ыйын бырааһынньыктарынан  сибээстээн уонна эбии төлөбүрдэр бэриллэллэринэн, биэнсийэ төлөбүрүн кыраапыгар уларыйыылар баалларын туһунан life.ru ааҕыныстыба иһитиннэрдэ.

Ый бастакы күннэригэр төлөбүрү ылар биэнсийэлээхтэр муус устарга икки биэнсийэни ылыахтара: биирин ый саҥатыгар, иккиһин муус устар бүтүүтэ.

Ону тэҥэ, ыам ыйын бырааһынньыктарын иннинэ 330 тыһыынчаттан тахса биэнсийэлээх эбии төлөбүрү ылыахтара, онно РФ бырабыыталыстыбата 23,3 млрд тахса солкуобайы көрбүтэ.

Эбии төлөбүр кээмэйэ араас буолар.
80 000 солкуобайы  сэрии бэтэрээннэрэ, инбэлииттэрэ, огдооболоро, концлааҕырдарга сокуоннай саастарын туола иликтэринэ хаайыллыбыт дьон ылыахтара.

55 000 солкуобайы Аҕа дойду Улуу сэриитин сылларыгар бэриниилээх үлэлэрин иһин ССРС уордьаннарынан эбэтэр мэтээллэринэн наҕараадаламмыттар, фашистскай концлааҕырдар,  геттолар хаайыылаахтара ылыахтара.

Маны таһынан, ыам ыйын 1 күнүттэн гражданскай авиация көтөр экипажтарын урукку чилиэннэригэр уонна таас чох бырамыысыланнаһыгар  буортулаах уонна уустук үлэ усулуобуйатыгар үлэлээбит дьоҥҥо биэнсийэҕэ эбии төлөбүрдэри саҥаттан ааҕыы (перерасчет) баар буолуоҕа.

Социальнай пуонда Саха сиринээҕи салаата субуотаҕа — муус устар 26 күнүгэр эмиэ үлэлиирин туһунан иһитиннэрдэ.