Төҥүлүгэ оҕо ускуустубатын оскуолата муусука үстүрүмүөннэрин тутта

Мэҥэ Хаҥалас улууһугар Төҥүлүтээҕи оҕо ускуустубатын оскуолата Музыка үрдүкү оскуолатыттан үстүрүмүөннэри тутта.

Маны сэргэ,  бу оскуола анал литературалары биэрдэ. Быйыл сайын тыа сирин ускуустубаҕа оскуолата баһаартан эмсэҕэлээбитэ, үөрэх кыһатын бары мала-сала уокка былдьаммыта.

«Музыка үрдүкү оскуолатыгар махталбыт улахан. Атын үөрэх кыһаларыттан кэллиэгэлэрэ эмиэ көмөлөһөллөрүгэр, өйөбүл, тирэх буолалларыгар ыҥырабыт, — диэн СӨ Култуураҕа уонна духуобунай сайдыыга миниистирин бастакы солбуйааччы Владислав Левочкин ускуустуба оскуолаларыгар туһаайан эттэ. – Геокультурнай сайдыы института үбүнэн-харчынан тирэх буоларын сэргэ, оскуола преподавателлэригэр квалификацияларын үрдэтэргэ босхо куурустары тэрийэн ыытар, Төҥүлүтээҕи оҕо ускуустубатын оскуолатын выпускниктарын түмэн үтүө санаа кэнсиэрин тэрийэргэ бэлэмнэнэр. Бэриллибит биир үстүрүмүөн оҕо салгыы үөрэнэригэр көмөлөһүө».

СӨ Култуураҕа уонна духуобунай сайдыыга министиэристибэтин пресс-киинэ