Мындаҕаайылар байыастарга көмөлөрө уҕараабат

Мындаҕаайы бөһүөлэгэр “Алаһа” дьахталлар уопсастыбаннай түмсүүлэрэ кулун тутар ыйыттан саҕалаан Дьокуускайдааҕы “Народный фронт” хамсааһын үлэтигэр кыттыһаннар, 20 устуука хаххалыыр сиэккэни өрүүгэ эбэһээтэлистибэни ылыммыттара. Бу туһунан Санаолох.рф суруйар.

Күн бүгүн 14-с сиэккэлэрин өрөн түмүктээн эрэллэрин туһунан, түмсүү бэрэссэдээтэлинэн быйылгыттан талыллан үлэлиир Мария Дьячковская иһитиннэрдэ.

“Бу иннинэ нэһилиэкпит дьоно сэргэтэ, буойуттарбытыгар анаан “Эргиллиэм хайаан да!” диэн харысхал набордарын, эмтээх оттору ону таһынан 80-ча мөһөөччүгү, 70-тан тыһ. солк. тахса харчы, дроннартан байыаннай тиэхэньикэни көмүскүүргэ нэһилиэк эр дьонуттан 84 устуука илими, араас эми-тому хомуйан ыыппыттара. Билигин биһиэхэ 4 түөлбэ: “Сарыал”, “Бэс”, “Сардаҥа”, “Төрүт” — тэҥинэн үлэлэһэ олороллор, о.э күн аайы сарсыарда 10 чаастан саҕалаан ыкса киэһээҥҥи диэри 8-тыы киһи иккилии станокка сиэккэни өрөллөр. Күҥҥэ быһа холоон 40-ча киһи мустар. Билигин сайыҥҥы сынньалаҥ буолан Мындаҕаайыбытыгар сиэттэр бөҕө кэллилэр, дьороччу улааппыт оскуола кыргыттара, устудьуон оҕолорбут кэлэннэр күүс-көмө, илии-атах буолан абыраатылар. Дьон-сэргэ түмсэрэ, бука бары санааларын ууран, бииргэ үлэлиирбит-хамныырбыт – бу буоллаҕа, дойдубут туһугар патриотизмныы сыһыаммыт”, — диэн Мария Андреевна өрүү буоларын курдук лоп-бааччы, тиэтэлэ суох сэһэргээтэ.

Манна даҕатан эттэххэ, Чурапчы улууһугар Мугудайга, Хайахсыкка, Мырылаҕа маннык хабааннаах үлэлэр күүскэ ыытыллаллар.

Семен Жендринскай.