Мүрү 1-кы нүөмэрдээх оскуолатын бүтэрбит, билигин үөрэммит кыһаларыгар үлэлиир эдэр педагогтар эҕэрдэлииллэр

Уус Алдан улууһун Мүрү 1-кы нүөмэрдээх оскуолата төрүттэммитэ 150 сылын туолар. Бу оскуолаттан кынат үүннэринэн тахсыбыт, билигин үөрэммит кыһаларыгар үлэлии сылдьар 8 эдэр учуутал, 5 эдэр педагог баар. Оскуолатааҕы сылларын бэлиэ түгэннэриттэн тиһэн үйэтитэллэр, эҕэрдэлэрин тириэрдэллэр.

Мин Мүрү маҥнайгы нүөмэрдээх маанылаах оскуолатын 2006 сыллаахха бүтэрбитим, билигин куорсун анньыммыт,  кынат үүннэрбит оскуолабар үөрэх чааһыгар дириэктэри солбуйааччынан үлэлиибин. Маҥнайгы кылааска Васильева Матрена Дмитриевнаҕа, онтон салгыы Константинова Мария Гаврильевнаҕа үөрэммиппит. Кыра эрдэхпиттэн аангылыйа тылыгар интэриэстээх буолан, бэһис кылаастан английскай тыл учуутала буоларга быһаарынан, утумнаахтык дьарыктанан барбытым. Миигин киэҥ билиилээх учууталлар уһуйбуттарыттан олус үөрэбин. 2012 сыллаахха Хотугулуу-Илиҥҥи федеральнай университеты ситиһиилээхтик бүтэрэн, билигин омук тылын үрдүкү категориялаах учууталабын, Уус Алдан улууһун эдэр учууталларын ассоциациятын бэрэссэдээтэлэбин, номнуо бэйэм үөрэппит оҕолорум аангылыйа тылын учууталларынан үлэлээн саҕалаатылар.

Омук тылын сэргэ саха тылын уонна төрүт култуура уруоктара ордук чугастара. Учууталларым Охлопкова Надежда Харитоновна, кылааһым салайааччыта Мигалкина Галина Егоровна олус элбэх сыраларын биэрэн научнай-практическай кэмпириэнсийэлэргэ, олимпиадаларга, күрэхтэргэ кыттыннарбыттара, тэрийэр, салайар, саҥарар дьоҕурбун сайыннарбыттара олоҕум тухары туһалаах. Үлэбинэн элбэхтэ атын омук дьонун кытта алтыһарбар төрүт тылбын, төрөөбүт норуотум култууратын, төрүт үгэстэрин билэрим олус көмөлөөх.

Нуучча тылын уонна литэрэтиирэтин уруоктарын олус сөбүлүүрум. Учууталбыт Винокурова Римма Ивановна кыһаллан үөрэппитэ, сүрдээх ирдэбиллээх учуутал буолан эппиэтинэстээх, чиэһинэй буоларга үөрэммиппит.

Өрөспүүбүлүкэбит, улууспут биир бастыҥ, кырдьаҕас үөрэҕин кыһата — Мүрү 1-кы нүөмэрдээх маанылаах оскуолабыт бары бэтэрээннэрин, учууталларын, үлэһиттэрин, үлэлээн ааспыт кэллиэгэлэрбитин, бары сылларга оскуоланы бүтэрбиттэри уонна үөрэнээччилэрбитин өрөгөйдөөх үбүлүөйбүтүнэн итиитик-истиҥник эҕэрдэлиибин!

Анна Николаевна Артамонова, Мүрү 1 нүөмэрдээх орто оскуолатын үөрэх чааһыгар дириэктэри солбуйааччыта, аангылыйа тылын үрдүкү категориялаах учуутала, «Надежда Якутии» бэлиэ хаһаайката, Уус-Алдан улууһун эдэр учууталларын ассоциациятын бэрэссэдээтэлэ, СӨ Ил Дарханын гранын кыайыылааҕа.

Биһиги Мүрү 1-кы нүөмэрдээх орто оскуолатын 2012 сыллаахха 19 буолан бүтэрбиппит. Бастакы кылааска 2002 сыллаахха үөрэнэ киирбитим. Дириҥ билиилээх, үрдүк култууралаах, оҕоҕо ураты кыһамньылаах маҥнайгы учууталым Мария Гаврильевна Константинова, биһиэхэ үөрэппит оҕолоругар чиҥ билиини биэрбитэ.

Бэһис кылааска биирдиилээн биридимиэттэри дириҥэтэн үөрэтэр хайысхаларынан арахсан үөрэммиппит, мин физика-математика хайысхалаах кылааска киирбитим. Кылааспыт салайааччытынан РФ уопсай үөрэхтээһинин үтүөлээх үлэһитэ, СӨ үөрэҕин туйгуна Татьяна Павловна Борисова анаммыта. Кини киэҥ билиилээх, сырдык, ыраас санаалаах, хас биирдии оҕоҕо ураты болҕомтону уурар учуутал этэ. Учууталбытын бары убаастыырбыт, таптыырбыт,  үөрэтэр уруоктарын долгуйа күүтэрбит. Татьяна Павловна элбэх оҕону билиигэ-үөрэххэ кынаттаабыта. Кини үөрэппит оҕолоро олоххо бэйэлэрин миэстэлэрин булан, дойду араас муннуктарыгар таһаарыылаахтык үлэлии сылдьаллар. Олоҕум суолугар эрэллээхтик үктэннэрбит, өйөбүл тирэх буолбут күндү учууталбын Татьяна Павловнаны куруутун махтана саныыбын, суохтуубун.

Саныыбын эйигин мэлдьитин

Саргылаах олоҕум суолугар

Үлэлиир-түбүктээх күннэрбэр

Үрдүккэ дабайар кэмнэрбэр.

Татьяна Павловна бүтэһик бүтэртэрбит кылааһыттан үс үөрэнээччитэ оскуолабытыгар кэлэн үлэлии сылдьабыт: Лыткина Людмила Борисовна — нуучча тылын уонна литэрэтиирэтин учуутала, Лаптев Денис Артурович — эбии үөрэхтээһин педагога уонна мин Бурцева Ольга Ивановна.

Оскуоланы бүтэрбиппит син ыраатта да, сыл аайы кылааһынан көрсөбүт, ханна да сырыттарбыт бэйэ-бэйэбитин билсэбит, көмөлөсүһэбит, олус иллээхпит. Биһини түмпүт, доҕордуу буоларга үөрэппит учууталбытын Татьяна Павловнаны куруутун  махтана саныыбыт.

Үөрэммит оскуолабар үлэлии сылдьарым миэхэ улахан эппиэтинэһи үөскэтэр. Киэн туттабын үөрэммит оскуолабынан, бииргэ үөрэммит доҕотторбунан, күндүтүк саныыр учууталларбынан уонна оскуолабар үлэлиирбинэн! Өрөгөйдөөх 150 сыллаах үбүлүөйгүнэн, тапталлаах үөрэхпит кыһата!

Ольга Ивановна Бурцева, Мүрү 1-кы нүөмэрдээх оскуолатыгар үөрэх чааһыгар дириэктэри солбуйааччы, нуучча тылын уонна литэрэтиирэтин учуутала, «Надежда Якутии» бэлиэ хаһаайката, СӨ Ил Дарханын гранын кыайыылааҕа.

Мин оскуола аанын 1994 сыллаахха арыйан, 1 “в” кылааска киирбитим. Кылааһым салайааччыта Пермякова Валентина Алексеевна буолар. Ол саҕана  алын кылаастар икки мэндиэмэннээх мас оскуолаҕа үөрэнэрбит. Билигин санаатахха, мас оскуолабыт олус да үчүгэй, сылаас тыыннаах эбит. Маҥнайгы учууталбыт биһиэхэ олуһун кыһаллара, бүөбэйдиирэ. Мүнүүтэҕэ ааҕыы, төгүлү үөрэтии, кинигэ ааҕыыта, Саҥа дьыллааҕы тэрээһиҥҥэ “Чиполлинаны” туруоруу, урок таһынан ыытыллар тэрээһиннэр, иккис этээскэ уһун көрүдүөр устун мэниктээһин — бу барыта мин өйбөр оҕо сааһым умнуллубат түгэннэрэ буолан хаалбыттар. Маҥнайгы учууталбар Валентина Алексеевнаҕа махталым муҥура суох.

Бэһис кылааска үс этээстээх таас оскуолаҕа үөрэнэ киирбиппит. 5 “в” кылааска алын сүһүөхтэн “абвг” кэлбит оҕолор бары биир гуманитарнай кылаас буолбуппут. Кылааспыт салайааччытынан Татаринова Зоя Ивановна анаммыта. Учууталбыт аан маҥнайгыттан ирдэбиллээх буолан, кылааспыт бэрээдэгэ үчүгэй этэ. Оскуоланы бүтэрэн барыахпар диэри ырбаахыны, көстүүмү устубакка кэппитим, оннук сылдьа үөрэнэн хааламмын, Саха судаарыстыбаннай университет устуоруйаҕа бакылтыатыгар бастакы күннэргэ өрүү көстүүмнээх сылдьарым, испэр, тоҕо көстүүм кэппэттэрий дии саныырым. Бииргэ үөрэнэр доҕотторум гимназискын дуо дииллэрэ. Кылааспытыгар бары эбээһинэстэрдээх этибит – ыстаараста, казначей, успуорт, хаһаайыстыбаннай сектордар, сибэкки көрөөччү… Кылааспыт — 307-с кэбиниэт иккис дьиэбит курдук этэ. Олус харыстыырбыт, бэйэбит сууйарбыт-тарыырбыт. Зоя Ивановна хайаан да миэстэбитин уларытар этэ. Кимниин олорорум буоллар диэн долгуйуу буолааччы. Учууталбыт ирдэбиллээх буолан биһигини бэрээдэктээх, толоругас буоларга үөрэппитэ.

Кылааспытынан элбэх тэрээһинҥэ кыттар этибит. Саамай өйдүүллэрим оскуолабытыгар ыытыллар “Ыллаа, үҥкүүлээ оҕо саас” бэстибээл өйдөнөн хаалбыт. Бары турунан туран бэлэмнэнэрбит, нүөмэрдэр барыта үрдүк таһымнаах буолааччылар. Саҥа дьылбытыгар тутуспутунан кылааспытын киэргэтэрбит. Туризмҥа оскуоланан бары походтуу барарбыт, түһүмэхтэринэн күрэхтэһиилэр буолаллара. М.В. Ломоносовка анаммыт урокпут, М.И. Цветаеваҕа анаммыт аһаҕас урокпут барыта уһуллан билигин өйдөбүнньүк буолан сылдьар. Улахан кылаастарга учууталбыт көҕүлээһининэн, кылааспыт “Альтаир” диэн ааттаах туспа былаахтаах, девизтаах этибит. Зоя Ивановна элбэх тэрээһинҥэ кытыннаран, кыһаллан биһиги олус эйэлээх, түмсүүлээх кылаас буолбуппут. Өрүүтүн сибээспитин тута сылдьабыт.

Ордук Местников Петр Петрович ыытар устуоруйа, Зоя Ивановна ыытар нуучча литтэрэтиирэтин уруоктарын сэҥээрэрим. “Евгений Онегин”, “Капитанская дочка”, “Война и мир”, “Вий” ааҕарбытын билигин да ахта саныыбын. Учууталларбыт биһиэхэ үөрэнэр кэмнэрбитигэр дириҥ билиини иҥэрэн, бары баҕарбыт үөрэхтэрбитигэр киирбиппит.

2009 сыллаахха үөрэхпин бүтэрэн дойдубар, үөрэммит оскуолабар кэлэн үлэбин саҕалаабытым. Үөрэппит учууталларым сүбэлэрэ күүс-көмө буолбута. 2011 сыллаахха 5 “а” кылааһы ыламмын, 2018 с. оскуоланы бүтэртэрбитим. Учууталым Зоя Ивановна холобурунан үөрэнээччилэрбэр куруутун чугастык сыһыаннаһааччым, тэҥҥэ сылдьааччым. Кылааспар 17 үөрнээччилээхпин, ол эрэн, тохсуһунан, онуһунан бүтэрбит оҕолорбун барыларын аахтахха 28-лар. Үөрэнээччилэрим туһунан кэпсээтэххэ бэйэтэ  үөрүүлээх, уһун кэпсээн буолар.

Оскуолабыт өрөгөйдөөх үбүлүөйүнэн  учууталларбар махталбын биллэрэбин, үөрэммит оскуолабар үлэлиирбинэн киэн туттабын. Куруутун ахтабын-саныыбын бииргэ үөрэммит доҕотторбун. Барыгытын оскуолабыт 150 сыллаах үбүлүөйүнэн эҕэрдэлиибин!

Алексей Михайлович Мигалкин иитэр үлэҕэ дириэктэри солбуйааччы, устуоруйа учуутала.   

Ханнык баҕарар киһиэхэ үөрэнэн, кынаттанан тахсыбыт оскуолата, бииргэ үөрэммит оҕолоро, үөрэҕи, билиини биэрбит учууталлара өйгө-санааҕа, сүрэххэ мэлдьи хатанан, олох саамай кэрэ кэмнэрэ, хатыламмат түгэннэрэ буолаллар.

Мин Мүрү 1-кы нүөмэрдээх орто оскуолатыгар 1996 с. бастакы кылаастан ыла үөрэммитим. Оскуоланы 2006 с. бүтэрбитим. Ааҕарга, суруйарга үөрэппит бастакы учууталым Бурцева Анастасия Николаевна. Алын сүһүөх кылааска үөрэммит кэммин  истиҥник саныыбын, оҕо сааһым саамай умнуллубат кэрэ кэмнэрэ буолар. Онтон бэһис кылаастан хайысхаларынан арахсыбыппыт. Бэһис кылааска гуманитарнай хайысхалаах кылааска үөрэммиппит, нуучча, саха, омук тылларын дириҥэтэн үөрэппиппит. 5-9 кылаастарга биһигини бэрт сэмэй, эйэҕэс майгылаах саха тылын уонна литэрэтиирэтин учуутала Мигалкина Галина Егоровна бэйэтин оҕолорун курдук олус истиҥник сыһыаннаһан, кылааспытын салайан илдьэ сылдьыбыта. Онтон оскуоланы омук тылын учуутала Аммосова Мария Андреевна бүтэртэрбитэ.

Кылааспытыгар сүүрбэттэн тахса буолан үөрэммиппит. Биһиги үөрэххэ, билиигэ тардыһыылаах,  олус иллээх, түмсүүлээх  кылаас  этибит.  Ол курдук, оскуола ыытар тэрээһиннэригэр, араас таһымнаах олимпиадаларга, куонкурустарга  өрүү көхтөөхтүк кыттарбыт. Биһигини баай уоппуттаах, билиилээх, ытыктанар учууталлар үөрэппиттэрэ: Местникова Н.А, Федорова Е.Е, Винокурова Р.И, Мигалкина Г.Е уо.д.а. Билигин биһиги  учуутал идэтин баһылаан, үөрэммит, үүнэн-сайдан тахсыбыт оскуолабытыгар үөрэппит учууталларбытын кытта ситиһиилээхтик үлэлии сылдьабыт. Кылааспытыттан иккиэбит – Анна Николаевна Артамонова, үөрэх чааһыгар дириэктэри солбуйааччы, мин оскуола бибилэтиэкэтигэр алтыс сылбын үлэлиибин. Биһиги кылаастан 6 киһи учуутал идэтин баһылаан улуус, өрөспүүбүлүкэ араас муннуктарынан үөрэх эйгэтигэр үлэлии сылдьабыт. Оскуоланы бүтэрбиппит номнуо 17 сыл буолла, кылааһынан мустан көрсөбүт, оскуолатааҕы кэмнэрбитин ахтан-санаан, оҕолуу үөрэн-көтөн атаарабыт.

Мүрү маҥнайгы нүөмэрдээх орто оскуолатын араас сылларга бүтэрбиттэртэн, билигин уопсайа 13 буолан үлэлии сылдьабыт. Ону таһынан саҥа кэлбит эдэр учууталлар бааллар. Уус Алдан улууһун эдэр учууталларын ассоциациятын салайааччыта Анна Николаевна Артамонова СӨ Ил Дарханын Граныгар кыттан кыайан, 2022 с. улуустан 25 эдэр учуутал, оскуолаттан 7 эдэр учуутал талыллан Санкт-Петербург – Казань  куоракка идэни үрдэтиигэ  функциональнай кырааматынаска үөрэнэн кэлбиппит. Кэлэр-барар айаммыт босхо этэ, үөрэхпитин эрэ төлөөбүппүт. Мин Санкт-Петербург куораты аан маҥнайгытын көрөр буолан, олоҕум биир саамай умнуллубат, интэриэһинэй түгэнэ буолан хаалла.

Тапталлаах  оскуолабын үбүлүөйдээх 150 сылынан  итиитик-истиҥник эҕэрдэлиибин! Оскуолам  үлэһиттэригэр, ытыктабыллаах учууталларга  өссө да инникитин үгүс үүнэр көлүөнэ  ыччаты иитэн- үөрэтэн таһааран, утумнаах үлэҕитигэр үрдүк чыпчааллары,  тус олоххутугар дьолу-соргуну баҕарабын!

Диана Дмитриевна Гаврильева, педагог- бибилэтиэкэр.

Биһиги 2012 сыллаахха Мүрү 1-кы нүөмэрдээх орто оскуолатын бүтэрбиппит. Кылааспыттан оскуолабытыгар үлэлии сылдьааччылар үһүөбүт. Үөрэммит кыһатыгар үлэлиирбититтэн үөрэбит уонна киэн туттабыт.

Биһиги кылааспыт дьоллоох оҕо сааспыт  салайааччыта Борисова Татьяна Павловна, хас биирдии оҕо майгытын табан, иилээн-саҕалаан салайан, ийэлии такайан, олоххо туохтан да чаҕыйбакка өрүү иннибит диэки дьулуурдаахтык туруулаһан, туруоруммут сыалбытын ситиһэргэ үөрэппитэ. Олус элэккэй, эйэҕэс, ийэ тэҥэ киһибитин олус таптыырбыт, холобур оҥосторбут. Ол да иһин буолуо, биһиги кылаастан үөрэхтээһин эйгэтигэр үлэлии-хамныы сылдьар учууталлар бэһиэбит. Куруук учууталбытын ахтабыт, баара буоллар төһө эрэ үөрүө этэ дии саныыбын.

Оскуолабыт 150 сыллаах үбүлүөйүгэр бэлэмнэниинэн күүстээх үлэ барар. Үөрэммит оскуолабытыгар күүс-көмө буола сылдьарбытыттан икки бүк үөрэбин. Өссө да үүнэ-сайда, чэчирии тур, тапталлаах үөрэхпит кыһата!

Людмила Борисовна Лыткина, нуучча тылын уонна литэрэтиирэтин учуутала.

Мин Мүрү 1-кы нүөмэрдээх орто оскуолатыгар 2002 сыллаахха бастакы кылааска үктэммитим. Маҥнайгы учууталым Константинова Мария Гаврильевна бэрт кыһамньылаах, ирдэбиллээх учуутал этэ. Ол иһин үлэҕэ, олоххо дьулуурдаах буолбуппун дии саныыбын. 2005 сыллаахха алын кылааһы түмүктээн, математика хайысхалаах 5 “б” кылааска киирбитим. Кылааспыт салайааччытынан алгебра уонна геометрия учуутала Борисова Татьяна Павловна анаммыта. Учууталбыт эйэҕэс майгытын, истиҥ сыһыанын, уустугу өйдөтөр ураты дьоҕурун күн бүгүҥҥэ диэри көрүстэрбит эрэ уос номоҕо оҥостон махталынан ахтабыт. Олус көхтөөх, түмсүүлээх кылаас этибит, оскуола ыытар тэрээһиннэригэр куруутун ситиһиилээхтик кыттарбыт. Оскуоланы 2012 сыллаахха 19 буолан бүтэрбиппит. Билигин бары сөбүлүүр идэбитинэн   ситиһиилээхтик үлэлии-хамныы сылдьабыт.

Кылааспытыттан учуутал идэтин талан, үөрэммит оскуолабытыгар үһүө буолан үлэлии сылдьабыт. Мин 2019 сылтан эбии үөрэхтээһин педагогунан үлэлиибин. Учууталым Мария Гаврильевна алын кылааска үөрэппит оҕолоругар,  билигин 6 “а” кылаас үөрэнээччилэригэр кылаас салайааччытабын. Учууталбын Татьяна Павловнаны холобур оҥостон, оҕолорбун кытта биир тылы булан куруутун аһаҕастык кэпсэтэбин, оскуола ыытар бары тэрээһиннэригэр көхтөөхтүк кыттабыт. Кылааһым оҕолоро араас таһымнаах куонкурустарга, олимпиадаларга, күрэхтэһиилэргэ кыттан биирдиилээн ситиһиилэринэн үөрдэллэр, кылаас, оскуола чиэһин  элбэхтик  көмүскүүллэр.

Үөрэммит оскуолам өрөгөйдөөх 150 сыллаах үбүлүөйүнэн барыгытын итиитик-истиҥник ис сүрэхпиттэн эҕэрдэлиибин! Туйгун үөрэнээччилэри, үрдүктэн үрдүк ситиһиилэри баҕарабын.

Денис Артурович Лаптев, эбии үөрэхтээһин педагог-организатора, 6 “а” кылаас салайааччыта.

Хабырылла Дьөгүөрэп аатын сүгэр Мүрү 1-кы нүөмэрдээх орто оскуолатын 2015 сыллаахха туйгун сыананан бүтэрбитим. Оскуолаҕа үөрэммит сылларым олус тэтимнээхтик ааспыттара. Мин бастакы учууталым — Ноговицына Евдокия Гаврильевна, 5-9 кылаастарга кылаас салайааччытынан илдьэ сылдьыбыт алгебра уонна геометрия учуутала Лена Александровна Исакова уонна 11-с кылааһы таһаарбыт нуучча тылын уонна литэрэтиирэтин учуутала Черкашина Зинаида Петровна буолаллар. Учууталларбын олус күндүтүк саныыбын, кинилэргэ махталым муҥура суох.

Быйыл VIII төгүлүн ыытыллар өрөспүбүлүкэтээҕи  “Моя профессия – IT” диэн куонкуруска оскуолаттан хамаанда туруоран, 9 “в” кылаас үөрэнээччилэрин кытыннаран, 3-с истиэпэннээх дьупулуомунан, харчынан наҕараадаланныбыт. Икки күн устата оҕолор “RPG Olonkho” бэйэлэрин бырайыактарын оҥорбуттара. Бырайыак кыра оҕолору көмпүүтэр оонньуутун нөҥүө саха норуотун олоҥхотун, фольклорун үөрэтэр соруктаах. Бу хамаанда бастакы улахан ситиһиитэ буолар, ол иһин инникитин  үрдүк чыпчааллары дабайыахтара, элбэх интэриэһинэй бырайыактары оҥоруохтара диэн эрэнэбин.

ХИФУ физика-тиэхэньиичэсэкй институтун   кыһыл дипломунан бүтэрэн, учуутал идэтин баһылаан, оскуолабар быйылгыттан информатика учууталынан  кэллим. Бу аҕыйах күнүнэн оскуолабыт 150 сыллаах үбүлүөйүн бэлиэтээри сылдьабыт. Оскуолабыт күннэтэ тупсан, киэркэйэн иһэриттэн үөрэбин. Мин эмиэ оскуолабар бэйэм кылааппын киллэриэм диэн эрэллээхпин. Оскуолабын өрөгөйдөөх 150 сыллааах үбүлүөйүнэн барыларын итиитик-истиҥник эҕэрдэлиибин уонна сылын аайы үүнэ-сайда, тупса турарыгар баҕарабын.

Сайаана Васильевна Протопопова, информатика учуутала.

Мин Мүрү 1-кы нүөмэрдээх орто оскуолатын 11 “а” кылааһын 2016 сыллаахха ситиһиилээхтик бүтэрэн, олох киэҥ аартыгар үктэммитим.

Маҥнайгы учууталым Пестрякова Ольга Егоровна алын кылаас учуутала, ааҕарга-суоттуурга олус кыһамньылаахтык үөрэтэрин күн бүгүҥҥэ диэри өйдүүбүн. Миэхэ хара маҥнайгыттан үөрэххэ тапталы, дьулууру иҥэрбитэ.

Орто уонна үрдүкү кылаастарга үөрэнэрбэр кылаас салайааччыта устуоруйа уонна обществознание учуутала Рожин Валерий Валерьевич этэ. Кини учуутал быһыытынан оҕолорго олус истиҥ сыһыаннааҕа, үөрэхтээх, бэрээдэктээх, үлэһит дьон буоларбытыгар кыһаллара. Алтыс кылааска саамай өйдөөн хаалбыт түгэним, учууталбыт Саҥа дьылга хас биирдии хамсаныыны бэйэтэ толкуйдаан, үҥкүү туруоран, уопсай түмүккэ иккис миэстэни ылары ситиспиппит. Бу санаатахха, оскуолаҕа үөрэммит сылларым, үөрэппит учууталларым, бииргэ үөрэммит доҕоттору олоххо олус да күндү буолаллар эбит, ардыгар биир эмит күн оҕо сааһым хатыламмат күннэригэр төннөн ылыахпын баҕарабын. ХИФУ омук тылын бакылтыатын бүтэрэн, билигин тапталлаах оскуолабар аангылыйа тылын учууталынан үлэлиибин. Үөрэппит учууталларбар  махталым муҥура суох уонна кинилэри кытары тэҥҥэ  үлэлиирбинэн  киэн туттабын.

Тапталлаах оскуолабыт 150 сыллаах өрөгөйдөөх үбүлүөйүнэн итиитик-истиҥник эҕэрдэлиибин, оскуолабыт үөрэнээччилэрин ситиһиилэринэн кынаттанан мэлдьи инники күөҥҥэ сырыттын, өссө  да үүнэ-сайда чэчирии турдун!

Анастасия Андреевна Бочкарева, аангылыйа тылын учуутала.