Мытаахха – “Аартык” кыайыылаах

600-тэн тахса киһи олорор Мытаах нэһилиэгэр “Аартык”, “Дүөдэ”, “Дьөлөккөн” түөлбэлэр бааллар. Күннэтэ олохпут уларыйар, сайдар кэмигэр үлэлииргэ табыгастаах көрүҥҥэ ТОС-тарга уларыйаннар, араас хабааннаах тэрээһиннэри ыыталлар.

Нэһилиэккэ олоххо, үлэҕэ көхтөөхтөрүнэн “Аартык” олохтоохторо буолаллар. Дьону түмэр дьоҕурдаах, олохтоох сынньалаҥ киинин тутаах техүлэһитэ Диана Максимова сатабыллаахтык салайан, үлэлээбитэ хаһыс да сыла буолла. Түөлбэ олохтоохторо успуорт араас көрүҥнэригэр, Кыайыы 80 сылыгар аналлаах кэнсиэр-бэстибээлгэ, ыытыллар субуотунньуктарга, буолар араас хайысхалардаах Бүтүн Арассыыйатааҕы, өрөспүүбүлүкэтээҕи дьыктааннары суруйууга кытыннылар. Олор түмүктэринэн 2025 сылга “Аартык” ТОС бастаан, нэһилиэк дьаһалтатын көһөрүллэ сылдьар куубагын ыламмыт, олохтоохтор үөрүүбүт үрдээтэ. Ону таһынан, байыаннай дьайыы кыттыылаахтарыгар харчынан көмөҕө, хаххалыыр сиэккэни баайыыга кыайыы туһугар көхтөөхтүк кытынныбыт. Онон Ороһуоспа дьоһун күнүн иннинэ, үүммүт 2026 сылы бэлиэтиир тэрээһини ыыттыбыт.

Ааспыт сылга бэлиэ саастарын туолбуттарга ТОС олохтоохторун аатыттан бэлэхтэри, өр сылларга үөрэҕирии, уһуйаан тэрилтэлэригэр үлэлээбит үлэ бэтэрээннэрэ Татьяна Петровна, Владимир Афанасьевич Николаевтар иэримэ дьиэ тэринэн ыал буолбуттара 50 сылларынан итии-истиҥ эҕэрдэбитин тиэртибит.

Соһуччу үөрүүлээх түгэн буолла — дьоһун ыалларбыт Валентина, Илья Константиновтар бэйэлэрин баҕа санааларынан салайтаран, нүөмэрдэргэ сөп түбэһиннэрэн иһирэх хоһооннордоох латарыайаны ыытаннар, бары илии тутуурдаах, үөрүүбүт-сүргэбит көтөҕүллэн, саҥа сылы көрүстүбүт.

Үүммүт 2026 сылга нэһилиэкпит бары олохтоохторугар этэҥҥэ буолуу эрэ түстэннин!

Николай Осипов,

РФ Суруналыыстарын сойууһун чилиэнэ.

Горнай улууһун Мытаах нэһилиэгэ.

Хаартыска ааптар тиксэриитэ.