Мытаахха  “Далбар Хотун”  ансаамбыл 20 сыла

1941-45 сыллардааҕы Аҕа дойду сэриитигэр Сэбиэскэй норуот кыайыытынан түмүктэммитэ 80 сылынан, Арассыыйаҕа Аҕа дойдуну көмүскээччитин, Саха сиригэр Ийэ дойдуну көмүскээччи сылын чэрчитинэн “Далбар Хотун” ырыа ансаамбыла тэриллибитэ 20 сылыгар аналлаах дьоро тэрээһин буолан ааста.

2005 сыллаахха нэһилиэкпитигэр Кыайыы 60 сылыгар тыыл, үлэ бэтэрээннэрин “Алгыс” (салайааччы Т.Н.Тимофеева) ырыа хора саҥардыллан, “Далбар Хотун” ансаамбыл тэриллибитэ. Ансаамбыл салайааччытынан олоххо көхтөөх, тэрийэр, дьону түмэр, салайар дьоҕурдаах Марина Степановна Пахомова, онтон старостанан элэккэй майгылаах Варвара Гаврильевна Тимофеева, уус-уран салайааччынан үрдүк анал үөрэхтээх Надежда Назаровна Саввина бастакы хардыыларын сахпыттара.

20 сыл эттэххэ дөбөҥ – бу сыл тухары араас хабааннардаах ырыалары үөрэтэн, көрөөччүлэргэ тириэрдэн, биһирэбили ыларга элбэх көлөһүҥҥүн тоҕон ситиһэҕин. Бу түһүмэхтэри “Далбар Хотун” ансаамбыл ситиһиилээхтик туораан, ырыаны ымыы оҥостоннор улуус, өрөспүүбүлүкэ араас көрүҥнэрдээх күрэхтэрин дипломаннарынан, лауреаттарынан буоланнар 20 сылларын үөрэ—көтө көрүстүлэр.

Ансаамбыл “Далааһыннаах үлэлээх  Далбар Хотун буолабыт” девиһинэн сиэттэрэн, ыллаан — туойан араас тэрээһиннэргэ, аһымал аахсыйаларга кытынна.

Ыччаты төрөөбүт дойдуну таптыырга, Аҕа дойду сэриитин саҕанааҕы ырыалары сөргүтүүнү, эйэлээх олоҕу бөҕөргөтүүнү, киһи киинэ түспүт сирэ күндүтүн көрөөччүлэргэ тиэрдэн кэллилэр. Үөрүүлээх күҥҥэ Аҕа дойду сэриитин ырыаларын, самаан сайыны уруйдуубун, эйэлээх олоҕу туойабын, төрөөбүт дойдуга таптал хайысхаларынан ыллааннар  көрөөччүлэри сэргэхситтилэр.

Ансаамбыл 20 сыллаах түгэнинэн нэһилик дьаһалтата, тэрилтэлэр, улуустааҕы култуура уонна духуобунай сайдыы управлениета, бэтэрээн сэбиэтэ эҕэрдэлээтилэр.

20 сыл эҥкилэ суох салайан кэлбит Марина Степановна Пахомоваҕа СӨ бочуоттаах бэтэрээнэ үрдүк бэлиэ туттарылынна. Бу сыллар тухары элбэх ырыалары үөрэппит уус-уран салайааччытыгар Саввина Надежда Назаровнаҕа “Горнай улууһун култууратын бочуоттаах үлэһитэ”  аат иҥэриллиннэ.

Тэрээһин уратытынан билигин ыллыы сылдьар ансаамбыл 10 ырыаһытыгар дьиэ кэргэттэрэ, үлэлээбит тэрилтэлэрэ бэлэх биэрэннэр соһуччу үөрүү буолла. Дьокуускай куоракка олорор биир дойдулаахпыт Надежда Епифанова бэтэрээн ырыаһыттарга барыларыгар ис санаатыттан бэлэх ууммута төрөөбүт сиргэ тапталын умнубатын туоһулуур.

“Далбар Хотун” 20 сылын устатыгар 20-н тахса нэһилиэк тыыл, үлэ  бэтэрээннэрэ ыллаан, дуоһуйа сынньанан аастылар, хомойуох иһин онтон үгүстэрэ олох тыйыс сокуонунан олохтон туораабыттара, үөрүүлээх биэчэргэ кинилэри истиҥ сылаас тылларынан ахтан-санаан аастылар.

Николай Осипов, РФ суруналыыстарын сойууһун чилиэнэ, Дьиикимдэ бөһ.

Хаартыска: Н.Осипов ыытта