Мытаахха Дьокуускайтан “Добун” этнофольклорнай наруодунай ансаамбыл ыалдьыттаата

500-с тыһыынчаттан тахса ахсааннаах саха омуга муусука эгэлгэтин араас көрүннэринэн сайдыылаах Европа, Азия, Латинскай Америка дойдуларыгар бэйэтин төрүт үҥкүүтүн, ырыатын, оһуокайын, олонхотун үрдүк таһымнарга туруоран, көрдөрөн, билиһиннэрэн болҕомтолорун биһирэбиллэрин ылыан ылар. Дьэ, ол иһин оҕону оскуолаҕа үөрэнэр кэмиттэн омукпут үгэстэригэр үөрэтии, чугаһатыы биһиги сүрүн сыалбыт буолар.

Куорунай улууһун Мытааҕар Дьокуускай куорат  политехническай лиссиэй “Добун” норуодунай этнофольклорнай ансаамбыла “Күннээх күпсүүр тойуга” айар түһүлгэтинэн ыалдьыттаан барда.

Норуодунай ансаамбыл: күпсүүр, чардаат, былаайах, араҥас барабаан, айаан, ойдуо, хомус, дьаҕа, кырыымпа омукпут үйэлэртэн-үйэҕэ илдьэ кэлбит ураты көстүүлэрдээх, тыастаах-уустаах доҕуһуоллуур инструменнарынан айылҕаҕа, булка алтыһыы, боотурдары бэлэмнээһин, уолу-кыыһы иитии үгэстэригэр олоҕуран саха кутун-сүрүн дууһатын иҥэригэр көрдөрүүлэри толороннор көрөөччүлэр сүргэлэрин көтөхтүлэр.

Оскуола иһинэн тэриллибит норуодунай ансаамбылга 100 үөрэнээччи дьарыктана сылдьар. Кинилэр ситиһиилэрэ сылтан-сыл аайы үрдүк үктэллэргэ дабайан иһэр. Ол курдук, этно-фольклорнай муусука Аан дойдутааҕы бириэмийэ, “Алмазы” Саха Өрөспүүбүлүкэтин лауреаттара, СӨ “Азия оҕолоро” пуонда степендиата, этнофольклорнай аан дойдутааҕы, Бүтүн Арассыыйатааҕы бэстибээллэр кыайыылаахтара. Улахан көрүүлэргэ ситиһиилэр ансаамбыл салайааччыта,  РФ уопсай үөрэхтээһин бочуоттаах үлэһитэ, СӨ култууратын туйгуна, куорунайдар биир дойдулаахпыт Марина Ильинична Сокольникова-Мохначевская,  оскуола дириэктэрэ Надежда Константиновна Тимофеева уонна үөрэнээччилэр төрөппүттэрин сыралаах, түбүктээх түмсүүлээх айар үлэлэрин түмүктэрэ буолаллар.

Нэһилиэкпитигэр тэриллибит күпсүүрүнэн дьарыктанар оҕону- иитэр дьиэ кэргэттэрэ Павловтар “Дьөһөгөй”  ансаамбылларын оҕолоругар Марина Ильинична салалтатынан маастар кылаас көрдөрдүлэр.

Сахабыт омугун кэскилэ “Добун” этнофольклорнай норуодунай ансаамбыл сайда-үүнэ, чэчирии тур диэн алгыс тылбытын этэбит.

Николай Осипов РФ суруналыыстарын сойууһун чилиэнэ,

“СӨ ыччат политикатын туйгуна” бэлиэ хаһаайына, үлэ бэтэрээнэ.   Дьиикимдэ бөһ.