Мытаахха «Өбүгэ үгэһин сөргүтэн» тэрээһин болҕомтону тардар

Горнай улууһугар Мытаах музей-галереята «Өбүгэ үгэһин сөргүтэн» диэн тэрээһини бастакытын 2021 сыллаахха тэрийбитэ. 

Дьон-сэргэ улаханнык биһирээбитэ. Онно түөрт биэни ыабыттара. Бу сэҥээриини ылбыт тэрээһин пандемия кэмигэр тохтообута.

Быйыл Арассыыйаҕа Дьиэ кэргэн, Саха сиригэр Оҕо саас сылларыгар анаан иккис төгүлүн тэрилиннэ уонна алта биэни ыырга сорук туруорулунна. Бэҕэһээ, от ыйын 7 күнүгэр, бастакы күммүт бэрт үөрүүлээх саҕаланна. От ыйын 14 күнүгэр диэри буолар тэрээһиҥҥэ Дьокуускайтан, Бэрдьигэстээхтэн, Мытаахтан элбэх киһи оҕолорун, сиэннэрин кытта кэллилэр. Бу кэнчээри ыччакка өбүгэ үгэһин билиһиннэрэр, үөрэтэр сыаллаах-соруктаах тэрээһин буолан, дьиэ кэргэнинэн сэргээн, сэҥээрэн кэлэн кытталлара кэрэхсэбиллээх. Кымысчыт Серафим Григорьев кымыһын, биэтин үүтүн тото-хана, астына истилэр. Кымыс, үүт атыыластылар, ыабыт үүттэрин илдьэ бардылар.

Мытаахха туризм күүскэ сайдар, онно бу тэрээһиммит эмиэ сыһыаннаах. Нэһилиэкпитигэр кэлбит ыалдьыттар народнай суруйааччылар Семен, Софрон Даниловтар литературнай музейдарын уонна академик Афанасий Осипов хартыыналарын галереятын көрөллөр. Олорбут үөрэммит, ураты тыыннаах Бор алааһыгар сылдьаллар.

Артур Егоров, «Мытаах музей-галереята» МБТ дириэктэрэ

Хаартыскаларга Артур Егоров түһэриитэ.