Мытаахха кинигэ биһирэмэ буолла

Горнай улууһун Мытаах нэһилиэгэр үөрүүлээх күн буолан ааста.

Саха норуодунай суруйааччыта, Максим Горькай аатынан РСФСР судаарыстыбаннай бириэмийэтин лауреата, Былатыан Ойуунускай аатынан САССР судаарыстыбаннай бириэмийэтин лауреата Софрон Данилов саха норуотун маҥнайгы кэнгириэһигэр эппит дакылаатын 30 сылыгар ананан тахсыбыт “Народ саха на пути созидания” (“Саха норуота барҕарыы суолунан”) кинигэ биһирэмэ үрдүк таһымнаахтык, өрө көтөҕүллүүлээхтик буолла.

Кинигэ «Дани-Алмас” хампаанньаҕа 450 экземплярынан бэчээттэнэн таҕыста. Кинигэни оҥрдулар: эрэдээктэр-оҥорон таһаарааччы –  Горнай улууһун баһылыгын бастакы солбуйааччы Сардана Стручкова, редакционнай хамыыһыйа – Горнайдааҕы кииннэммит бибилэтиэкэ ситимэ, Мытаах музей-галереята.

Кинигэ “Горнай улууһа” муниципальнай оройуон уонна “Мытаах нэһилиэгэ” муниципальнай тэриллии үбүлээһиннэринэн таҕыста.

Софрон Данилов «Саха норуота барҕарыы суолунан» дакылаата  сахалыы уонна нууччалыы тылынан киирдэ. Дакылаат нууччалыы тылбааһын тылбаасчыт Любовь Борисова оҥордо. Ыстатыйалары нуучча тылыгар тылбаастааһыҥҥа Марина Андреева, Маргарита Максимова, корректураҕа Елена Пономарева үлэлэстилэр.

Кинигэҕэ Ил Дархан Айсен Николаев; СӨ бастакы Бэрэсидьиэнэ Михаил Николаев; СӨ Судаарыстыбаннай мунньаҕын (Ил Түмэн) бэрэссэдээтэлэ  Алексей Еремеев; Горнай улууһун баһылыга Никита Андреев; саха норуодунай поэта, Саха сирин суруйааччыларын сойууһун бэрэссэдээтэлэ Наталья Харлампьева; саха норуотун 1 Кэнгириэһин дэлэгээтэ, Аҕа дойдуга үтүөлэрин иһин 2-с истиэпэннээх уордьан кавалера,  СӨ норуотун хаһаайыстыбатын үтүөлээх үлэһитэ, Горнай улууһун, Бэрдьигэстээх нэһилиэгин  Бочуоттаах олохтооҕо  Евдокия Тарасова; саха норуотун 1 Кэнгириэһин дэлэгээтэ, СӨ үтүөлээх учуутала, Горнай улууһун Бочуоттаах олохтооҕо Василий Николаев дакылаат суолтатын, Софрон Петрович туһунан истиҥ ахтыылара киирдилэр. “Правда” хаһыакка  1988 сыллаахха  тахсыбыт Вадим Дементьев Софрон Даниловтан ылбыт  “Наш собеседник –писатель  Софрон Данилов “И только правда ко двору»  интервьюта  кинигэ ис хоһоонун байытан биэрдэ.

Биһирэмҥэ Горнай улууһун баһылыга Никита Андреев, саха норуодунай бэйиэтэ, Саха сирин суруйааччыларын сойууһун бэрэссэдээтэлэ Наталья Харлампьева, “Аҕа дойдуга үтүөлэрин” иһин 2-с истиэпэннээх уордьан кавалера, СӨ норуотун хаһаайыстыбатын үтүөлээх үлэһитэ, Горнай улууһун уонна Бэрдьигэстээх нэһилиэгин бочуоттаах олохтооҕо, саха норуотун 1 кэнгириэһин дэлэгээтэ Евдокия Тарасова, СӨ муниципальнай сулууспатын туйгуна, бэтэрээнэ, Мытаах нэһилиэгин Бочуоттаах олохтооҕо, нэһилиэк дьокутааттарын сэбиэтин дьокутаата Федора Васильева тыл эттилэр.

Тэрээһин биир бэлиэ түгэнинэн Петр Аввакумов аатынан улуустааҕы киин бибилэтиэкэ Семен, Софрон Даниловтар олохторун, айар үлэлэрин туһунан бибилэтиэкэ саайтыгар оҥоһуллубут  медиапортал биһирэмэ буолла. Аныгы сыыппара эйгэтигэр сөп түбэһиннэрэн сүдү суруйааччыларбыт олохторун, айар үлэлэрин баай ис хоһоонноох медиапортал ааптара, эдэр кэскиллээх бибилэтиэкэр Анастасия Сергеева билиһиннэрдэ.

Киэн туттар биир дойдулаахпыт Софрон Петрович Данилов «Саха норуота барҕарыы суолунан” диэн дириҥ ис хоһоонноох дакылаата сайдыы суолун саҕар сырдык сирдьит, үтүө сүбэһит буолан көлүөнэттэн көлүөнэҕэ бэриллэн истин!

Айталина Санникова,

бибилэтиэкэр, суруналыыс.

Горнай, Бэрдьигэстээх.

Хаартыскалар: ааптар тиксэриилэрэ