Мытаахха тыйаатыр дьоро киэһэтэ

СӨ норуоднай артыыската Мария Ивановна Варламова төрөөбүтэ 95 сылыгар аналлаах үөрүүлээх тэрээһин Горнай улууһун Мытаах нэһилиэгин И.Е. Варламов аатынан сынньалаҥ киинигэр толору саала дьону муста. Бу туһунан Саха тыйаатыра иһитиннэрдэ.

Ахтыы киэһэтигэр көрөөччү кутун-сүрүн туппут Саха тыйаатырын артыыстара Анатолий Николаев, Зоя Багынанова, Михаил Апросимов, Маргарита Борисова кытыннылар. Итиэннэ  Мария Ивановна оонньообут Ф. Буляков «Ньургуһун иккистээн тылыннар» испэктээкилиттэн быһа тардыыны көрдөрдүлэр.

«Эн-мин дэсиһэн бииргэ үлэлээн ааспыт дьоммут, ытык артыыстарбыт бэлиэ күннэригэр, үбүлүөйдэригэр кыттыыны ылан, кинилэри ахтан санаан ааһар Саха тыйаатырын  биир үтүө үгэһэ буолар.
Ытык киһибит Мария Варламова үбүлүөйдээх сылыгар ахтыы киэһэтин үрдүк таһымнаахтык тэрийбит Горнай улууһун уонна Мытаах нэһилиэгин дьаһалтатыгар, култуура салалтатыгар, дьонугар-сэргэтигэр Саха театрын аатыттан барҕа баһаам махталбытын биллэрэбит», — диэн тыйаатыр ТГ ханаалыгар суруйдулар.