Н.Д. Неустроев аатынан Литература бириэмийэтин Анатолий Храмов тутта

40 саастарыгар диэри эдэр суруйааччыларга аналлаах Н.Д. Неустроев аатынан литература бириэмийэтэ төрдүс төгүлүн туттарылынна. 2023 сыл түмүгүнэн лауреат үрдүк аатын былырыын «Дорога жизни» хоһоон хомуурунньугун таһаарбытын уонна Москва, Дьокуускай куораттарга патриоттуу тыыннаах айар көрсүһүүлэри ыыппытын иһин, поэт Анатолий Храмов сүктэ.

Киниэхэ наҕарааданы бириэмийэ хамыыһыйатын аатыттан норуот суруйааччыта Николай Лугинов туттарда. Бириэмийэни олохтооччу – Олег Сидоров бэрэссэдээтэллээх «Саха сирин суруйааччыта» ассоциация.

Н.Д. Неустроев аатынан ыччат литератураҕа бириэмийэтин туттарыы сиэрэ-туома байыаннай дьайыыга баҕа өттүнэн баран сырдык тыынын толук уурбут Дьааҥы эдэр поэта Василий Рожин кинигэлэрин сүрэхтэниитин кэмигэр буолбута кэрэхсэбиллээх. Санатар буоллахха, бу бириэмийэ 2022 сыллааҕы лауреатынан Анал байыаннай дьайыыга кыргыһыы хонуутугар охтубут хорсун буойун ааттаммыта, лауреат бэлиэтин балта Евгения Рожина туппута.

Анатолий Храмов харда тылыгар, дойду историята кэрэһэлииринэн, араас сэриилэргэ кыттыбыт буойун суруйааччылар туох нөҥүө ааспыттарын айымньыларыгар дьүһүйэн кэлбиттэрин, ол билиҥҥи Анал байыаннай дьайыыга кытта сылдьар уонна сырдык тыыннарын толук уурбут уолаттар айар үлэлэригэр эмиэ көстөрүн бэлиэтээтэ. Кэлин улахан хабааннаах айымньылар үөскүөхтэрин сөбүгэр эрэнэрин биллэрдэ. Уонна бэрт эрэллээхтик: «Хаһан да буоларыныы кыайыы биһиэнэ буолуоҕа!»–диэн эттэ.

Анатолий Николаевич Храмов Эдьигээн улууһугар 1994 сыллаахха төрөөбүтэ. Нуучча-саха хааннаах, бэйэтин эбэҥкинэн ааҕынар, нууччалыы уонна сахалыы тэҥинэн билэр. Олоххо көхтөөх позициялаах уол Эдьигээн оскуолатыгар үөрэнэр кэмигэр байыаннай-патриоттуу кулуубу тэрийбитэ. ХИФУ омук тылын уонна регионнары үөрэтии институтун бүтэрбитэ. Устудьуоннуур сылларыгар «Молодежь Якутии» хаһыакка үлэлээн бас эрэдээктэргэ тиийэ үүммүтэ, «Юнармия» оҕо уонна ыччат хамсааһыныгар үлэлэспитэ. А.И. Прошляков аатынан Тюменнааҕы үрдүкү байыаннай-хамаандалыыр училищеҕа анал үөрэҕи баран сапер идэлэммитэ. Муус устарга, алтынньыга анал байыаннай дьайыыга рота хамандыырын быһыытынан кыттыбыта. Бойобуой наҕараадалардаах, ол иһигэр «Хорсунун иһин» мэтээллээх. Билигин Саха Өрөспүүбүлүкэтигэр тэриллибит БПЛА этэрээтин хамаандалыыр. 2023 сылтан Россия суруйааччыларын сойууһун чилиэнэ. Кэргэннээх, оҕолордоох.

Манна даҕатан эттэххэ, Анатолий салайар байыаннай холбоһугар Василий Рожинныын Анал байыаннай дьайыыга бииргэ сылдьыбыт уолаттар бааллар эбит.

Анатолий оскуолаҕа уонна университекка үөрэнэр кэмигэр нууччалыы хоһоон суруйарга холоноро. Анал байыаннай дьайыыга кытта сылдьан уонна госпитальга эмтэнэр кэмигэр бу дьарыгар эргиллэн кэлбитэ, хоһооннорун бойобуой доҕотторо сэргээбиттэрэ. Эдэр поэт былырыын саас «Дорогой жизни» диэн хоһооннорун бастакы хомуурунньуга СӨ культураҕа уонна духуобунай сайдыыга министиэристибэтин өйөбүлүнэн бэчээттэнэн тахсыбыта.

Кинигэ сүрэхтэниитэ ыам ыйын 11 күнүгэр М.К. Аммосов аатынан ХИФУ «Сэргэлээх уоттара» культура киинигэр буолбута. Иккис сүрэхтэнии Москваҕа Россия Суруйааччыларын сойууһун «Литературная гостиная» саалатыгар бэс ыйыгар буолбута. Былырыын ыам ыйын 30 күнүгэр Москва куоракка буолбут Россия Суруйааччыларын сойууһун секретариатыгар айар чилиэнинэн ылыллыбыта. Кинини айар холбоһукка киирэргэ норуот суруйааччыта Николай Лугинов, норуот поэта Наталья Харлампьева, Россия Суруйааччыларын сойууһун сэкирэтээрэ, поэт Гаврил Андросов уонна СӨ үтүөлээх суруналыыһа, прозаик Данил Макеев мэктиэлээбиттэрэ.

Туйаара Павлова.