«Саха сирин суруйааччылара» ассоциация Николай Неустроев аатынан литературнай бириэмийэни эдэр, кэскиллээх ааптардарга үһүс сылын туттарар. Быйылгы бириэмийэни анал байыаннай эпэрээссийэҕэ дьоруойдуу охтубут Василий Рожиҥҥа анаатылар. Бириэмийэни бииргэ төрөөбүт балта Евгения Рожина тутта.
— Саха литературатын классига Николай Денисович Неустроев — уһулуччулаах суруйааччы. Нууччалыы наһаа үчүгэйдик суруйар буолан, бастакы айымньыларын Арассыыйа сурунаалларыгар таһаартарбыта, ону улахан үөрэхтээх нуучча киһитэ суруйар дии саныыллар эбит. Саха кэпсээнин классика таһымыгар тута таһаарбыт киһи. Онон саха литературата быһаччы классикаттан саҕаламмыта. Кини баара-суоҕа 34 сааһыгар өлбүтэ, онон эдэр киһи этэ. Эдэр ааптардарга Неустроев аатынан бириэмийэ олохтоммута оруннаах, — диэн норуодунай суруйааччы Николай Лугинов бэлиэтээн эттэ.
Суруйааччылар Рустам Каженкин, Гаврил Андросов, Евгения Рожина уонна Н.Неустроев аатынан бириэмийэ былырыыҥҥы лауреата Надежда Ильина.
— Бу ааспыт сэрэдэҕэ убайбыт суох буолбута 40 хонугун туолла. Ол күн эрийэн, бириэмийэни анаабыттарын туһунан иһитиннэрбиттэрэ, хайдах эрэ убайым бэйэтэ бэлиэ биэрбитин курдук этэ. Наһаа долгуйбуппут, үөрбүппүт. Мин убайбыттан икки эрэ сыл балыс буоламмын, тэбис-тэҥҥэ оонньоон, үлэлээн, игирэлэр курдук улааппыппыт. 40 хонугар диэри букатын итэҕэйбэккэ, кыайан ыыппакка сырыттым, бэйэм сорҕом суох буолбутун курдук этэ… Бу кэнниттэн убайым бэйэтин биллэрбит, уоскуппут диэн санаа кэллэ.
Биһиги дьиэ кэргэммит аатыттан суруйааччыларга улахан махталбытын тиэрдэбит. Суруйааччылар сойуустара ходатайство суруйан, онон военкоматтар хамсанан, убайбын түргэнник аҕаллылар, төрөөбүт Дьааҥытын буоругар кистээтибит. Сороҕор, аҕалар да наһаа бытаан, эрэйдээх буолар үһү. Ону тэҥэ, биир идэлээхтэрэ ырыа, хоһоон, ыстатыйа суруйан, кини айымньылара дьоҥҥо тарҕаннылар, бүтүн өрөспүүбүлүкэ үрдүнэн аата ааттанна, онон махталбыт улахан, — диэн туран, балта Евгения Василий Рожин урут бэчээттэммит кинигэтин бэлэхтээтэ.
Наталья Харлампьева, Саха сирин суруйааччыларын сойууһун бэрэссэдээтэлэ:
— Ааспыт сүбэ-мунньахха кини бэлиэтэммитэ, хоһооннорун хомуурунньуга бэчээттэниэхтээх диэн буолбута. 2023 сылга »Айарга» бэчээттэниэхтээх кинигэлэр былааннарыгар Василий Рожин хоһооннорун кинигэтин киллэрдибит. Онон кэлэр сылга бэйиэт кинигэтэ бэчээттэнэн тахсыаҕа. Барбытын да кэннэ, суруйааччылар кэккэлэригэр киллэрэр, аатын үйэтитэр былааннаахпыт. Дойдутугар ыытар тэрээһиннэргэ кыттыһарга бэлэммит. Москваҕа Ийэ дойдуну көмүскээччилэр айымньыларынан тахсыахтаах кинигэҕэ хоһооннорун ыыттыбыт. Эдэр суруйааччылар сүбэ-мунньахтарыгар кинини чахчы дьоҕурдаах киһи диэн көрбүтүм. Талааннаах, улахан бэйиэккэ хайдах эрэ, нууччалыы эттэххэ, »трагические мироощущение» баар буолар, ол Васяҕа баара биллэр этэ... – диэн эттэ.
Николай Неустроев аатынан литературнай бириэмийэ 100 тыһыынча солкуобай харчылаах, эдэр ааптардарга көмө, тирэх буолар сыаллаах.
Сэтинньи саҕаланна да, Өктөөп идеяларын өрө тутан кэлбит оҕо, эдэр сааспыт күргүөмнээх күннэрэ хайдах да…
Үөрэх этэринэн, киһи орто сааһа 120 сыл диэн да, дьиҥэ, олохпут итинтэн быдан ырааҕынан кылгас. Быраастар,…
Сыл ахсын сэтинньи саҥатыгар Арассыыйа бары эрэгийиэннэригэр "Ускуустуба түүнэ" диэн аахсыйа ыытыллар. Тэрээһин Норуоттар сомоҕолоһууларын…
Мүөттээх бальзам 500 г. грецкэй эриэхэни, 300 г. мүөтү, 100 г. алоэ сүмэһинин, 4 лимону…
Сарсын, сэтинньи 4 күнүгэр, Дьокуускайга трофейнай байыаннай тиэхиньикэ быыстапката арыллыаҕа. Бу күн биир сүрүн тэрээһининэн…
Владивостокка буолбут Уһук Илиҥҥи хуор олимпиадатыгар "Кыра оҕолор хуордара" номинацияҕа кыттан, "Туймаада эрэлэ" дипломунан уонна үрүҥ…