Нам Хатырыгын олохтооҕор көмө быһыытынан сүөһү кэллэ

Сааскы халаантан эмсэҕэлээбит Нам улууһун нэһилиэктэрин олохтоохторугар тустаах көмө тиһигин быспакка оҥоһуллар. 

Ол курдук, улуустааҕы дьаһалта пресс-сулууспата иһитиннэрбитинэн, олохтоох бааһынай хаһаайыстыбалар айылҕа иэдээниттэн  эмсэҕэлээбиттэргэ көмөлөһөр аахсыйаҕа көхтөөхтүк кытталлар.

Бүгүн, бэс ыйын 6 күнүгэр, «Дайыына» бааһынай хаһаайыстыба салайааччыта Надежда Попова урбаанньыт уолунаан Александр Слепцовтуун Хатырык нэһилиэгин олохтооҕо Александра Слепцова бааһынай хаһаайыстыбатыгар кыһыл истиэп боруодалаах 10 ыанар ынаҕы уонна  биир ньирэйи аҕалан  биэрдилэр.

Надежда Ивановна бу хаһаайыстыбаҕа көмө быһыытынан кэлбит ньирэйдэргэ анаан биир бастакынан ынах үүтүн солбуйар ньирэй иһэр үүтүнэн (ЗЦМ) көмөлөспүтэ. Бу күннэргэ улуус бааһынай хаһаайыстыбалара эмиэ көмө быһыытынан ынах сүөһүнү тиэрдэр былааннаахтар.

Александра Слепцова үтүө санаалаах дьоҥҥо көмөлөрүн иһин истиҥ махталын тиэрдэр.