Наарданы сэҥээрээччи элбиир, күрэхтэһии сытыырхайар

Наардаҕа бэртээхэй күрэхтэһии буолла. Чөмпүйүөннэр ааттаннылар.

Дьокуускайга А.Е.Кулаковскай аатынан норуоттар доҕордоһууларын дьиэтигэр улахан дьоҥҥо наардаҕа өрөспүүбүлүкэтээҕи бастакы чөмпүйэнээт уонна ыччаттарга  Федерация бастакы кубога ыытылынна. Чөмпүйэнээт Саха сиригэр успуорт бу көрүҥүн дьиҥ таһымнаахтык билинии кэнниттэн ыытыллар. Быһаарыыны РФ Успуорка министиэристибэтэ 2022 сыллаахха кулун тутар ыйга ылбыта.

Күрэхтэһии бочуоттаах ыалдьыта, наарда Федерациятын президиумун чилиэнэ, наардаҕа турнирдар кыайыылаахтара уонна призердара Низам Фикрет оглы Ахундов:

—СӨ наарда Федерациятын Бэрэсидьиэнэ Аида Антонова Саха сирин билиэххин баҕарар буоллаххына, кыһын кэл диэн эппитэ. Кырдьык да, оннук эбит. Манна ирбэт тоҥноох сиргэ мэлдьи сылаас, истиҥ сыһыан олохсуйбут. Аэропортка көрсүһүүттэн саҕалаан, тэрээһини үрдүк таһымнаахтык ыытыыга тиийэ барыта олус үчүгэй. Успуорка маннык сыһыан биһигини үөрдэр. Саха сиригэр махтал! Дойдулаахтарбын көрүстүм, Өлүөнэ эбэни көрдүм. Чөмпүйэнээт салҕанарыгар уонна сыл ахсын ситиһиилээхтик ыытылларыгар баҕарабын, — диэтэ.

Кини маны сэргэ «Стратегия в игре длинные нарды, философия игры» лиэксийэ аахта уонна сүбэ-ама биэрдэ.

Чөмпүйэнээккэ барыта 48 киһи кытынна. Кинилэр ортолоругар Саха сиригэр биллэр-көстөр дьон эмиэ бааллар. Ол курдук, «Дыгын оонньууларын» хас да төгүл кыттыылааҕа Артем Варданян, параспортсмен Марат Николаев, дьокутаат Владимир Аммосов. Күөн күрэс кыттыылаахтарын СӨ успуорка миниистирин бастакы солбуйааччы Александр Бугаев, норуот дьокутаата Алиш Забид-оглы Мамедов, СӨ наарда Федерациятын Бэрэсидьиэнэ Аида Антонова, А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Корякина эҕэрдэлээтилэр.

Күрэхтэһиини СӨ наарда Федерацията, РФ наарда Федерацията СӨ Физическэй култуураҕа уонна успуорка министиэристибэтин өйөбүлүнэн тэрийдилэр. Мамедов Алиш Забид-оглы салайааччылаах Азурбайджан общината күөн күрэстэргэ спонсордаата.

Түмүк маннык таҕыста:

Наардаҕа өрөспүүбүлүкэтээҕи I чөмпүйэнээккэ: 1 миэстэ — Рашид Алырзаев, 2 миэстэ — Чаян Хатпаалык, 3 миэстэ — Михаил Спиридонов буоллулар.

Ыччаттарга Федерация бастакы кубогын кыайыылаахтарынан буоллулар: 1 миэстэ — Самир Дживишов, 2 миэстэ — Даниил Сосин, 3 миэстэ — Саина Ильинова. Оттон  7-12 саастаах оҕолорго кыайыылааҕынан Марк Дьячковскай буолла.

СӨ Ыччат дьыалаларыгар уонна социальнай коммуникацияларга министиэристибэ анал бирииһэ Самир Дживишовка туттарылынна. «Это у нас семейное» анал аат дипломунан Анастасия, Денис, Даниил Сосиннар уонна Марк Дьячковскай, Галина Коротова наҕараадаланнылар. Наарда өрөспүүбүлүкэтээҕи I чөмпүйэнээтэ ситиһиилээхтик ыытыллыбытынан диплом күрэхтэһии кылаабынай судьуйатыгар Ирина Ивановна Полятинскаяҕа туттарылынна.

Күөн күрэс кыттааччылара улаханнык сэргэхсийдилэр, маннык тэрээһиннэр өссө да салҕана туралларыгар баҕардылар, тэрийээччилэргэ махтаннылар.

А.Е.Кулаковскай аатынан норуоттар доҕордоһууларын дьиэтин пресс-сулууспата.

Хаартыскаларга Айталина Аргунова түһэриилэрэ