Национальнай архыып Улуу Кыайыы 80 сылыгар халандаар таһаарда

Саха сирин Национальнай архыыба Аҕа дойду Улуу сэриитигэр Кыайыы 80 сылыгар аналлаах 2025 сыллааҕы халандаары оҥорон таһаарда. Бу туһунан Национальнай архыып пресс-сулууспата иһитиннэрэр.

2025 сыллааҕы халандаар РФ Бочуоттаах архыбыыһыта, СӨ Национальнай архыыбын сүрүн археограба Александр Калашников 2005 сылтан 2024 сылга диэри «Воины-якутяне» диэн кинигэтин матырыйаалларын  кытта билиһиннэрэр.

Кинигэ серията 12 байыаннай-историческай очеркаттан турар. Таһаарыы хас биирдии кинигэтэ дойду көҥүлүн уонна тутулуга суох буолуутун иһин турууласпыт Саха сирин буойуттарын хорсун-хоодуот быһыыларын уонна тулуурдарын сырдатар.

Очеркалар РФ Оборуона министиэристибэтин Киин архыыбын, СӨ Национальнай архыыбын, Аҕа дойду Улуу сэриитин кыттыылаахтарын, ону кытта буойуттарын ахтыыларыгар уонна документальнай матырыйаалларыгар олоҕурар.

Александр Калашников чинчийбит үлэтэ норуот устуоруйаҕа өйдөбүлүн чөлүгэр түһэриигэ, үүнэр көлүөнэҕэ Улуу Кыайыы туһугар турууласпыт Саха сирин байыастарын хорсун быһыыларын сырдатыыга сүҥкэн кылаатынан ааҕыллар.