Национальнай бибилэтиэкэҕэ Космонавтика күнүгэр анаммыт быыстапка аһылынна

Өрөспүүбүлүкэ Национальнай бибилэтиэкэтин Актыып-киинигэр «Душа, рожденная Вселенной»   диэн ааттаах быыстапка аһылынна.

Тэрээһин бастакы космонавт Юрий Гагарин төрөөбүтэ 91 сылыгар уонна Космонавтика күнүгэр ананна.  Тэрийээччилэр бибилэтиэкэ пуондатын кинигэлэрэ Юрий Гагарин олоҕун уонна хоодуот быһыытын кэпсииллэр. Ыалдьыттарга анаан космоһы чинчийии  устуоруйатыттан – космонавтиканы төрүттээччи Константин Циолковскай теоретическай үлэлэриттэн саҕалаан, Арассыыйа космическай бырамыысаланнаһын аныгы ситиһиилэригэр тиийэ литератураны бэлэмнээбиттэр.

Быыстапканы  күн аайы 9:00 чаастан 20:00 чааска диэри Национальнай бибилэтиэкэ үһүс этээһигэр муус устар 15 күнүгэр диэри кэлэн көрүөххэ сөп.  Ону тэҥэ, муус устар 10 күнүгэр Национальнай бибилэтиэкэ саайтыгар «Гагарин – первый космонавт Земли» диэн виртуальнай быыстапка үлэлиэҕэ.

Санатан эттэххэ, 1961 сыл  муус устар 12 күнүгэр  ыстаарсай лейтенант Юрий Алексеевич Гагарин, «Восток» космическай хараабыга олорон, киһи аймах устуоруйатыгар аан бастаан Сири эргийэр орбитальнай көтүүнү оҥорбута. Бу күнү Арассыыйаҕа “Космонавтика күнэ” диэн бэлиэтииллэр, оттон аан дойдуга Киһи космоска көппүт норуоттар икки ардыларынааҕы күнүнэн биллэр