Национальнай бибилэтиэкэҕэ «Ускуустуба түүнэ» хайдах ааста?

Сэтинньи 4 күнүгэр Национальнай бибилэтиэкэҕэ Норуот сомоҕолоһуутун күнүгэр анаммыт «Ускуустуба түүнэ» бүтүн Арассыыйатааҕы аахсыйа ыытылынна. Быйылгы тэрээһин «Култууралар сомоҕолоһуулара – норуот күүһэ» диэн ыҥырыынан баран, кэпсэтии, айар-тутар үлэ уонна омуктар баай үгэстэригэр убаастабыл дьиҥнээх бырааһынньыга буолла.

Киэһэ 16:00-тан 20:00-ка диэри бибилэтиэкэҕэ тыыннаах култуура киинэ буолла. Тэрээһин үөрүүлээх аһыллыыта фанфара тыаһынан саҕаланна, онтон ыытааччылар ыалдьыттары «классикаттан авангардка диэри, муусукаттан уонна үҥкүүттэн тыйаатырга уонна ойуулуур-дьүһүннүүр ускуустубаҕа диэри – ускуустуба эгэлгэ эйгэтигэр дьикти айаҥҥа» ыҥырдылар. Бырагыраамаҕа монгол үҥкүүтэ, вена вальса, ааптар ырыалара, үнүстүрүмүөннээх айымньылар, фольклор нүөмэрдэрэ уонна хоһоон ааҕыылара киирдилэр.

«„Ускуустуба түүнэ“ Норуот сомоҕолоһуутун күнүнүүн дьүөрэлэспитэ олус бэлиэ. Тоҕо диэтэххэ, култуура дьону сомоҕолуур, оттон бибилэтиэкэҕэ – сомоҕолоһуу ордук чаҕылхайдык көстөр сирэ буолар. Бүгүн бииргэ үлэлиир дьоммут, доҕотторбут дууһаларын ууран бэлэмнэммиттэрэ көстөр: хас биирдии салаа бэйэтин идиэйэтин, көстүүмүн, бырагырааматын көрдөрдө. Бу – сомоҕолоһуу. Өрөмүөн бүтэн, үһүс уонна төрдүс этээстэри толору үлэлэттэхпитинэ, көрсүһүүгэ, айар үлэҕэ уонна алтыһыыга кыахпыт өссө кэҥиэҕэ», — диэн СӨ Национальнай бибилэтиэкэтин дириэктэрин солбуйааччы Александр Игнатьев санаатын үллэһиннэ. Киэһэ устата араас анал түһүлгэлэр үлэлээтилэр: аан дойду норуоттарын литературнай кафета: манна ыалдьыттар нуучча, саха, узбек, бурят, татаар, чечен астарын, ону тэҥэ Хотугу аҕыйах ахсааннаах төрүт омуктар күндү астарын амсайдылар. Доруобай аһылык туһунан уонна саха «Тар» диэн аһыы үүт аһын туһунан ликэсийэлэр ыытылыннылар. Омуктар астарын астааһыҥҥа, үҥкүүгэ, иискэ-ууска, архыып докумуоннарын ааҕыыга дьарыктаннылар. Ону таһынан, ыалдьыттар жонглируйдаан көрөр, оҕуруонан ытарҕа эбэтэр баттаҕы анньынар шпилька оҥорор, хабылык уонна хаамыска остуол оонньууларын баһылыыр кыахтаннылар.