Национальнай бырайыактарынан доруобуйа харыстабылын 15 эбийиэгэ тутуллуоҕа

Ол туһунан Ил Дархан Айсен Николаев доруобуйа харыстабылын боппуруостарыгар аналлаах мунньаҕар  этилиннэ. Кини чугастааҕы сылларга үлэ биир сүрүн хайысхатынан мэдиссиинэ инфраструктуратын салгыы сайыннарыыны бэлиэтээтэ.

Бигэргэтиллибит былаан быһыытынан, о.э. РФ бэрэсидьиэнэ көҕүлүүр «Уһун уонна көхтөөх олох», «Дьиэ кэргэн» уонна «Доруобуйа харыстабылыгар саҥа технологиялар»  саҥа национальнай бырайыактарынан, эрэгийиэҥҥэ 2028 сылга диэри өссө 15 саҥа эбийиэк тутуллуоҕа.
«Саха сиригэр Владимир Путин өйөбүлүнэн элбэх улахан үлэ ыытылынна. «Доруобуйа харыстабыла» национальнай бырайыак чэрчитинэн кэккэ улахан эбийиэк тутуллан үлэҕэ киллэрилиннэ. Билигин биһиэхэ Арассыыйа бэрэсидьиэнэ көҕүлүүр саҥа национальнай бырайыактарын олоххо киллэрэр сорук турар. Эппиэтинэс улахан -– эбийиэктэр бары болдьоҕор уонна хаачыстыбалаахтык тутуллан үлэҕэ киллэриллиэхтээхтэр», -– диэтэ Айсен Николаев.
Чуолаан, хайыы үйэ 2025 сылга 8 эбийиэги — Амма сэлиэнньэтигэр поликлиниканы, Бүлүү, Ньурба куораттарыгар уонна Нам улууһун Нам сэлиэнньэтигэр, Үөһээ Бүлүү улууһун Андреевскай сэлиэнньэтигэр эмтиир куорпустары, Майа сэлиэнньэтигэр балыыһа комплексын, Сангаар бөһүөлэгэр поликлиникалаах комплексы, Аллараа Бэстээххэ учаастак балыыһатын түмүктээһин былааннанар.
2027 сылга Аллараа Халыма улууһун Черскэй уонна Абый улууһун Үрүҥ Хайа сэлиэнньэлэригэр поликлиника уонна сытар балыыһа, Сангаарга уонна Өлөөн сэлиэнньэлэригэр сытар балыыһа үлэҕэ киллэриллиэхтэрэ.
2028 сылга Уус Алдан улууһун Бороҕон сэлиэнньэтигэр эмтиир куорпуһу, Дьокуускай куоракка 1 №-дээх поликлиниканы тутуохтара уонна Сунтаар сэлиэнньэтигэр балыыһа комплексын иккис уочаратын тутуу түмүктэниэҕэ.
Ону таһынан национальнай бырайыагынан 109 түргэнник хомуллар модульнай конструкцияны таҥыы, 88 эбийиэги өрөмүөннээһин былааннанар.
Атын да материальнай-тиэхиньиичэскэй базалары салгыы саҥардыы улахан суолталаах. Бу үлэ чэрчитинэн, 239 тырааныспары уонна мэдиссиинэ  1014 тэрилин атыылаһыы былааннанар.
Айсен Николаев эппитинэн, национальнай бырайыактар соруктарын толорор атын бырагыраамаларынан үлэ салҕаныахтаах. Чуолаан, судаарыстыба-чааһынай бииргэ үлэлээһининэн Дьокуускай куорат 2 №-дээх балыыһатын поликлиниката, сойуом дуогабарынан Дьокуускайга «Звезднай» микроройуоҥҥа саҥа поликлиника үлэҕэ киллэриллиэхтэрэ.
Арктика улуустарыгар улахан болҕомто ууруллар. «Арктиканы сайыннарыы» судаарыстыба бырагырааматынан 6 нэһилиэнньэлээх пууҥҥа: Аллайыаха улууһун Оленегорскайыгар, Булуҥ улууһун Сииктээҕэр, Дьааҥы Оһохтооҕор, Муома Кулун Өлбүтүгэр, Усуйаана Уйаандьытыгар, Эбээн Бытантай Дьарҕалааҕар биэлсэр-акушер пууннара былааннаналлар.
Ону сэргэ Дьокуускай куоракка сыстыганнаах ыарыылары эмтиир 245 куойкалаах килиниичэскэй  балыыһаны уо.д.а. эбийиэктэри тутуу бырайыактарын  олоххо киллэрии саҕаланыаҕа.  Нерюнгрига Киин балыыһа 14 эбийиэгэ саҥардыллыахтаах.
Айсен Николаев ону таһынан байыаннай дьайыы кыттыылаахтарын доруобуйаларын чөлүгэр түһэриигэ, каадырдарынан хааччыллыыга, үлэ төлөбүрүгэр, наукаҕа саҥаны киллэриигэ, салааны сыыппараҕа көһөрүүгэ уо.д.а. соруктары туруорда.