Национальнай мэдиссиинэ киинэ «Дьиэ кэргэн» национальнай бырайыак чэрчитинэн саҥа тиэхиньикэнэн хааччыллар

М.Е. Николаев аатынан 1№-дээх Өрөспүүбүлүкэтээҕи балыыһа – Национальнай мэдиссиинэ киинин Перинатальнай киинэ «Ийэни уонна оҕону харыстааһын федеральнай бырайыагы көхтөөхтүк олоххо киллэрэн саҕалаата. Бу бырайыак «Дьиэ кэргэн» национальнай бырайыакка киирэр. Балыыһаҕа национальнай бырайыак үбүнэн хааччыллар бастакы паартыйа аныгы мэдиссиинэ тэриллэрэ кэлэн үлэлээн эрэллэр диэн СӨ Доруобуйа харыстабылын министиэристибэтэ иһитиннэрэр.

«Дьиэ кэргэн» национальнай бырайыак – Арассыыйа национальнай бырайыактарыттан биирдэстэрэ, кини олоххо киириитэ 2025 сыл тохсунньу 1 күнүттэн саҕаламмыта уонна 2030 сылга диэри салҕаныаҕа. Бу 2024 сылга түмүктэммит «Демография» национальнай бырайыак кэҥэтиллибит салгыытынан буолар. Саҥа национальнай бырайыак саҕаланарын туһунан 2024 сыл олунньу 29 күнүгэр Арассыыйа Федерациятын Бэрэсидьиэнэ Владимир Владимирович Путин Федеральнай Мунньаҕар Этиилэригэр биллэрбитэ. Бу бырайыак дойдуга оҕолоох дьиэ кэргэттэр олохторун хаачыстыбатын үрдэтиигэ уонна төрөөһүн элбиирин өйүүргэ туһуламмытын тоһоҕолоон эппитэ. Бырайыак кураторынан РФ Бырабыыталыстыбатын Бэрэссэдээтэлин бастакы солбуйааччы Татьяна Голикова анаммыта.

Бу «Ийэни уонна оҕону харыстааһын» федеральнай бырайыак сыалынан оҕолонорго былаанныыр, хат дьахталларга уонна оҕолорго хаачыстыбалаах мэдиссиинэ көмөтүн оҥоруу, ону таһынан нэһилиэнньэ доруобуйатын бөҕөргөтүү буолар. Бырайыак биир сүрүн тэрээһининэн Арассыыйа үрдүнэн перинатальнай кииннэри мэдиссиинэ аныгы тэриллэринэн хааччыйыы, эбии хааччыйыы буолар, ол иһигэр оҕону төрөтөр салааҕа, эппэрээссийэлиир хосторго, дьахталлары уонна саҥа төрөөбүт оҕолору реанимациялыырга үрдүк технологиялаах тэриллэр киирэллэр.

М.Е. Николаев аатынан 1№-дээх Өрөспүүбүлүкэтээҕи балыыһа – Национальнай мэдиссиинэ киинин Перинатальнай киинэ национальнай бырайыак эрэгийиэннээҕи бырагырааматын чэрчитинэн араас оборудованиены ылан уонна үлэҕэ киллэрэр. Билиҥҥи туругунан былааннаммыт тиэхиньикэ 40 бырыһыана ылылыллыбыт. Киирбит тэриллэр истэригэр:

Хат дьахтары уонна саҥа төрөөбүт оҕо туругун тохтоло суох хонтуруоллууга – фетальнай монитордар.

Тыҥаны искусственнай тыыннарар тырааныспарга туруоруллар аппараттар – ыарыһахтары, ол иһигэр саҥа төрөөбүт оҕолору куттала суох таһыыга олус наадалаахтар.

Үрдүк частотаалаах электрохирургическэй аппараат – гинекологияҕа суһал эппэрээссийэни оҥорорго аналлаах тэрил.

Хааны уонна инфузионнай сурадаһыны сылытар аппарааттар – хааны кутар кэмҥэ ыарыһахтар гипотермияларын сэрэтэллэр.

Плазманы ириэрэр тэриллэр – хаан компоненнарын трансфузияҕа түргэнник уонна куттала суох бэлэмнииллэр.

Итинтэн да атын мэдиссиинэ тэрилинэн хааччыллыы барар.

Национальнай мэдиссиинэ киинэ аныгы мэдиссиинэ тэрилинэн хааччыллыыта – бу ийэ уонна оҕо доруобуйатын бөҕөргөтүүгэ, дьиэ кэргэни өйүүргэ уонна өрөспүүбүлүкэҕэ төрөөһүнү үрдэтэргэ усулуобуйалары олохтуурга «Дьиэ кэргэн» национальнай бырайыак чопчу хардыытынан буолар. Перинатальнай киини инники күөҥҥэ сылдьар мэдиссиинэ тиэхиньикэтинэн хааччыйыы үлэтэ салҕанар.