Ил Дархан Анал этиитигэр оҕо төрөппүт иитиитин сылааһыгар угуттанан улаатыахтааҕын бэлиэтээтэ.
Кини бу этиини оҕо барахсан Оҕо дьиэтигэр буолбакка, дьиэ кэргэҥҥэ иитиллэрин ситиһии сүрүн сорук буоларын, оҕо иитэ ылар ыалларга өйөбүлү оҥорууга сыһыаран эттэ.
Маныаха бэйэтин санаатын Ньурба улууһун Хатыы нэһилиэгин олохтооҕо, бэйэтин оҕолоро улааппыттарын кэннэ кэргэнинээн үс уол оҕону иитэ ылбыт Надежда Федотова санаатын үллэһиннэ:
— Быйылгы сыл Арассыыйаҕа Дьиэ кэргэн сылынан биллэриллибитин олус үөрэ, долгуйа истибитим. Оттон аны Ил Дархан Айсен Николаев Саха сиригэр Оҕо саас сылын биллэрэн, дьиэ кэргэн тутулун өссө күүһүрдэн биэрдэ. Үс уол оҕону иитэ сылдьар дьон, Аҕа баһылыкпыт оҕо ииттэ сылдьар дьоҥҥо ураты болҕомто уурбутун олус үөрэ иһиттибит. Бу иннинэ маннык дьиэ кэргэҥҥэ улахан болҕомто ууруллубат этэ. Үүнэр сылга оҕо иитэр дьиэ кэргэттэргэ өйөбүл оҥоһуллар буолбутугар Ил Дархаммытыгар барҕа махталбытын тиэрдэбит. Уолаттарбыт билигин аттыбыгар сүүрэ-көтө сылдьаллар. Киин куоракка олохсуйбут оҕолорбут бырааттарын өрүү сураһа, кэһии ыыта олороллор. Биһиги курдук улааппыт оҕолордоох дьон оҕо ииттэ ылан, төһөлөөх элбэх оҕоҕо ийэ уонна аҕа сылааһын биэриэхтэрэ этэй! Оҕо ииттэр ыалга дьоһуннаах өйөбүл оҥоһуллар. Өссө көмө ананыаҕын өрөспүүбүлүкэбит Аҕа баһылыга бэйэтин Анал иитиитигэр бигэргэттэ. Онон быйылгы Дьиэ кэргэн уонна Оҕо саас сылларыгар социальнай дьиэлэргэ олорор оҕолору ииттэ ылан, кырачааннарга дьиэ кэргэн сылааһын биллэриҥ диэн ыҥырабыт.