Надежда Петрова : «Көмөнү оҥоро туруохтаахпыт»

Ааспыт күһүҥҥүттэн Кэбээйи улууһун баһылыга Иван Иванович Левин салалталаах байыаннай сулууспалаахтарга уонна кинилэр дьиэ кэргэттэригэр көмөнү оҥорууга биэдэмистибэлэр икки ардыларынааҕы хамыыһыйа үлэлиир. Хамыыһыйа эппиэттээх сүрүннээччитэ, улуус дьаһалтатын экэниэмикэҕэ управлениетын начаалынньыга Надежда Гаврильевна Петрова бу хайысхаҕа ханнык дьаһаллар олоххо киирэ, үлэлии туралларын туһунан кэпсээтэ.

— Хамыыһыйа чилиэннэрэ гуманитарнай көмөнү эрэ оҥорботтор, араас аахсыйалары ыыталлар. Дьоҥҥо-сэргэҕэ, дьиэ кэргэттэргэ сүбэлэри биэрэллэр. Байыаннай сулууспалаахтартан уонна кинилэр дьиэ кэргэттэриттэн балачча элбэх араас өрүттээх сайаапкалар, этиилэр, көрдөһүүлэр киирэллэр. Ол курдук, 2022 сыл алтынньыттан ыла биһиги 100-тэн тахса сайабылыанньанан үлэлээтибит. Сайабылыанньалар араас ис хоһоонноохтор: саллааты дойдутугар, дьонугар төнүннэрии, олох-дьаһах боппуруостарын быһаарыы, уо.д.а. Хамыыһыйабытыгар итилэри тута быһааран иһэргэ кыһаллабыт.

Хас биирдии байыаннай дьиэ кэргэнигэр куратордар сыһыарыллан, дьиэ кэргэттэри кытта быһаччы үлэлииллэр. Нэһилиэнньэ, дьокутааттар, волонтердар тиэргэн хаарын ыраастааһын, уокка оттор маһы бэлэмнээһин, иһэр уу мууһун хааччыйыы, ас-үөл бородууктатынан көмөлөһүү курдук олох-дьаһах боппуруостарын быһаарыыга кытталлар. Байыаннай сулууспалаахтары уонна кинилэр дьиэ кэргэттэрин өйүүр пуондаҕа бүтүн улууһунан үбү-харчыны хомуйуу үлэтэ бара турар. Онуоха аһымал кэнсиэртэр нэһилиэк аайы ыытыллаллар.
Итини таһынан улуус баһылыгын Иван Левин ыҥырыытынан СӨ Дьиэ кэргэҥҥэ, ыччакка социальнай-психологическай өйөбүлү оҥорор киинин психологтара Сайылыкка, Мастаахха, Кэбээйигэ тиийэн, байыаннайдарбыт дьиэ кэргэттэрин кытта үлэлээбиттэрэ. Бу өттүгэр үлэ инникитин салҕаныаҕа.

Саха сирин тирэх пуунугар биһиги улууспут култуураҕа управлениетын начаалынньыга Алексей Терехов үлэлии сылдьар. Байыаннай сулууспалаахтарбыт көрсөр күчүмэҕэйдэрин тутатына быһаарыыга өрөспүүбүлүкэ тирэх пууннара дойдубут 4 эрэгийиэнигэр тэриллэн үлэлииллэр. Алексей Николаевич Кэбээйи улууһуттан буойуттары баран көрсөр, кинилэргэ улуустан уонна Саха сириттэн гуманитарнай көмөнү тиксэрэр эппиэттээх үлэлээх. Буойуттарбыт инники кирбиигэ бэйэ биир дойдулааҕын көрсөр ураты долгутуулааҕын бэлиэтииллэр: «Өйөбүл баарын билэ сылдьабыт, улууспут баһылыга Иван Иван Иванович Левин кэлэн көрсүбүтэ, онон дойдубутуттан көмүскэл баар диэн санаабыт бөҕөх», — диэн этэллэрин кини бэлиэтиир.

2022 сыл алтынньытыгар байыаннай сулууспалаахтарга көмөлөһүүгэ улуустааҕы пуонда Кэбээйи улууһун норуоттарын ассамблеятын пуондатыгар тэриллибитэ. Манна 1 853 089 үп хомуллубута: үөрэх тэрилтэлэриттэн 536 682 солк., култуураттан – 103 622 солк., юридическэй сирэйдэртэн – 697 270 солк., биирдиилээн дьонтон – 459 491 солк., атын тэрилтэлэртэн – 56 021 солк.
Итинник көмөлөрү таһынан байыаннай сулууспалаахтарга, кинилэр дьиэ кэргэттэригэр көмөлөһүүгэ кэккэ дьаһаллар үлэлии тураллар. Ол курдук, байыаннай сулууспалаах 5-11 кылааска үөрэнэр оҕотугар уопсастыбаннай тырааныспарга, киинэҕэ, спорт тэрилтэлэригэр босхо сылдьыы баар, төрөппүт сири түүлэһии төлөбүрүттэн, сир нолуогуттан босхолонор.
Волонтердар уонна олоххо көхтөөх дьон өрүү наадалар. Инники кирбиигэ сылдьар дьоммутун наадалааҕынан хааччыйар туһугар салгыы үп-харчы хомуйабыт. Биһиги сорукпут – байыаннай сулууспалаахтарбытын дьиэлэригэр күүтэллэрин билэллэрин туһугар бары күүспүтүнэн-кыахпытынан көмөнү оҥоро туруохтаахпыт.