“Надеждалар” быйыл сүүрбэччэ араас көрүҥнээх 861 таҥаһы тиктилэр

“Илии сылааһа” сыах (сал. Саввина И.Е.) филиала Куокуйдааҕы “Надежда” холбоһук (сал. Еремеева Т.У.) бу сылга оҥорбут үтүө дьыалаларын Улуу Кыайыы 80 сылыгар, СӨ Дойдуну көмүскээччилэр, улуустарыгар биллэриллибит Патриотизм сылыгар анаатылар.

Ситимнэрин быспакка, сылайбыты аахсыбакка, сорох түгэҥҥэ аҕыйаатыбыт диэбэккэ, байыаннай дьайыыга сылдьар Саха сирин уолаттарыгар сылы быһа иистэннилэр. Ааспыт сылга 612 таҥаһы тикпит буоллахтарына, бу сылга сүүрбэччэ араас көрүҥнээх 861 таҥаһы тиктилэр. Онно дождевик, ис таҥас кэмпилиэктэрэ, тактическай ырбаахылар, х/б көстүүмнэр, футболкалар, ыстааннар уо.д.а. киирэллэр. Байыаннай дьайыыттан дойдуларыгар кэлбит уолаттарга туох баарынан биэрэн, салгыы Дьокуускайдааҕы иис сыаҕар салайан ыыталлар. Онно “Илии сылааһа” иистэнньэҥнэрэ “Эр хоһуун” кэмпилиэгин биэрэллэр, бааһыран кэлбит уолга инклюзивнай таҥаһы кэтэрдибиттэрэ.

Саамай саастаах иистэнньэҥ И.А. Азарова кулун тутарга “Илии сылааһа” анаабыт босхо путевкатынан Москваҕа санаторийга сынньанан кэллэ.

“Волонтеры России” (ааптар Дария Маркова) кинигэҕэ матырыйаал ыытан, холбоһук үлэтин туһунан сырдатыллыбыта.

Куокуй нэһилиэгин ийэлэрэ, эбээлэрэ үбүлүөйдээх 2025 сылы түмүктээтилэр. Күн аайы салгыбакка “сэрии бүттэр ханнык, уолаттарбыт дойдуларыгар этэҥҥэ эргиллэн кэллиннэр” диэн көрдөһөллөр. Саҥа сылга ыра санаалара туоллар ханнык диэн эрэнэбит.

Ираида Софронеева.