Найахылар байыастарга көмөлөһөллөр

Уус Алдан улууһугар Найахыга «Симэх» түмсүү (кылынан, сиэлинэн дьарыктаналлар) нэһилиэктэр икки ардыларыгар биллэриллибит «Муниципальнай уопсастыбаннай сири-уоту сайыннарыы» куонкуруһугар кыттан, кыайыылааҕынан тахсыбыт. 

Бу кыайыыларынан кинилэр 203 000 солк. наҕараадаламмыттар. Онон байыастарга көмөлөһөр сыаллаах-соруктаах иистэнэр сыах (сал. Харитина Гоголева) тэриммиттэр.

Манна нэһилиэк иистэнньэҥнэрэ түмсэннэр, байыаннай дьайыыга сылдьар уолаттарга анаан таҥас-сап бөҕөнү тикпиттэр. Ол курдук, аан бастаан байыас уолаттар көрдөһүүлэринэн, кинилэр 35 комбинезону бэлэм оҥорбуттар. Ону тэҥэ кылтан угунньалары бэлэмнээбиттэр, харысхаллары оҥорбуттар. Маны барытын бэрт түргэнник бүтэрэ-оһоро охсоннор нэһилиэктэрин баһылыгар Петр Слепцовка туттарбыттар. Кини Дьокуускайга тэриллибит байыастар дьиэ кэргэттэрин түмсүүлэригэр тиэрдибит. Иһитиннэриллибитинэн, бу күннэргэ баһыылкаларын байыастарга илдьиэхтээхтэр.

Саргылана Никитина

Хаартыскалар: Харитина Гоголева тиксэриилэрэ