«Нам» айан суолугар икки массыына харсыспыт, биир киһи эмсэҕэлээбит

От ыйын 31 күнүгэр сарсыарда 8 чаас саҕана «Нам» айан суол 10-с биэрэстэтигэр массыыналар харсыһыыларынан түмүктэммит суол быһылаана таҕыста. Бу туһунан Саха сиринээҕи Госавтоинспекция  пресс-сулууспата иһитиннэрэр.

Бастакы дааннайдарынан, 52 саастаах «Тойота Королла» суоппара Улуу уулуссаттан Строд уулуссатыгар тахсан иһэн, «Тойота Ипсум» массыынаҕа суолу туораан биэрбэтэҕин түмүгэр харсыһыы тахсыбыт. «Тойота Королла» массыына пассажирын, 28 саастаах эр киһини, балыыһаҕа киллэрбиттэр. Түҥнэстибит массыына суоппара арыгы испитэ билиллибит — 0,18 мг/л. Суол быһылаанын чахчытынан бэрэбиэркэ ыытыллар. Госавтоинспекция санатарынан, итирик туруктаах уруулга олорбутун иһин 45 тыһ. солк. ыстараап уонна 1,5-тэн 2 сылга диэри суоппар быраабын быһыы көрүллэр, диэн Саха сиринээҕи ГИБДД иһитиннэрэр.