Нам бэтэрээннэрин сэбиэтэ 2023 сыллааҕы үлэтин түмүгүн таһаарда

Бу күннэргэ Нам улууһун бэтэрээннэрин сэбиэтэ ааспыт сыллааҕы үлэтин түмүгүн таһаарда. Нам улууһун бэтэрээннэрин сэбиэтин бэрэссэдээтэлэ Софья Кобякова сүрүн болҕомто аҕа көлүөнэ ааспыт албан ааттаах олоҕун ытыктыырга, үүнэр көлүөнэни патриотическай тыыҥҥа, олоҕу, үлэни таптыырга иитиигэ, айылҕабыт чөл туруктаах буолуутугар ууруллар диэн этэр.

Софья Дмитриевна үөлээннээхтэрэ бары тэрээһиннэргэ көхтөөхтүк кытталларын кэпсиир. Ол курдук өрөспүүбүлүкэтээҕи бэтэрээннэр сэбиэттэрэ таһаарбыт «От поколения к поколению» электроннай хомуурунньугар улуустан 7 киһи суруйуута киирбит. Аны туран өрөспүүбүлүкэтээҕи «Мы – патриоты страны» куонкуруска 4 бэтэрээн ситиһиилээхтик кыттыбыт.

Ааспыт сайын Амма улууһугар ыытыллыбыт илин эҥэр улуустарын өрөспүүбүлүкэтээҕи ыччат уонна бэтэрээннэр «Көлүөнэлэр» лааҕырдарыгар көхтөөхтүк кыттыбыттар. Модут агрооскуолатын «Чэчир» оҕо лааҕырын баазатыгар ыччат уонна бэтэрээннэр туристическай-патриотическай сүлүөттэрин үрдүк таһымнаахтык тэрийсэн ыыппыттар. Онно икки хамаанданы туруоран, 1-кы уонна 2-с миэстэлэри ылары ситиспиттэр.

Подмосковьетааҕы «Дорога памяти» байыаннай храм-түмэлгэ 4 нэһилиэк (Партизан, Искра, Хатыҥ Арыы, Фрунзе) сэриигэ кыттыбыт бары буойуттарын ааттарын, хаартыскаларын ыытаннар, үйэ-саас тухары биир дойдулаахтарын үйэтиппиттэр. Онон 2023 сылга уопсайа 496 буойун аата эбии киирбит. Ону таһынан сыл устата уоттаах сэриигэ сураҕа суох сүппүт 67 буойун аатын араас саайтартан көрдөөн булбуттарын эмиэ киэн тутта кэпсииллэр.

Бэтэрээннэр көмөлөрүнэн нэһилиэктэр историяларын үөрэтиигэ барыта 27 кинигэ, буклет, брошюра тахсыбыт. Улуус нэһилиэктэригэр 27 уулуссаҕа уонна тэрилтэҕэ биллэр-көстөр дьон ааттара иҥэриллэн үйэтитиллибит. 31 документальнай киинэ, видеонан килииптэри оҥорсубуттар. 16 нэһилиэккэ өйдөбүнньүк, бэлиэ миэстэлэр сөргүтүллүбүттэр. Сэрии сылларын оҕолоругар, тыыл бэтэрээннэригэр, 394 экз. «Эҥсиэли», «Забота-Арчы», о.д.а. хаһыаттарга босхо сурутуу ыытыллыбыт.

Бэтэрээннэр сэбиэттэрэ ыччаты патриотическай тыыҥҥа иитэргэ бары оскуолаларга «Уголок Воинской Славы» истиэндэ оноһулларын ситиспит. Нэһилиэктэр дьаһалталара оскуолалары кытта бииргэ үлэлээн, сэриигэ барбыт уонна эргиллэн кэлбит, дьоруойдуу кыргыһыы хонуутгар охтубут, уоттаах сэриигэ сураҕа суох сүппүт буойуттар ааттарын утумнаахтык үөрэтии ыытыллар.

«Байыаннай дьайыыга сылдьар оҕолорбутугар көмө аахсыйанан улуус бэтэрээннэрэ 746.950 солк. харчынан, сылаас таҥас хомуйан, маскировочнай сиэккэ баайан көмөлөстүбүт. Бэтэрээннэр олохторугар-дьаһахтарыгар, сынньалаҥнарыгар, оскуола оҕолорун патриотическай өйгө-санааҕа иитиигэ, о.д.а. барыта 62 тэрээһин ыытылынна», — диэн санаатын үллэһиннэ улуус бэтэрээнннэрин сэбиэтин бэрэссэдээтэлэ Софья Кобякова.