Нам быраастара быйыл ханна сылдьалларын былааннаатылар

Быйыл Намнааҕы кииннэммит улуус балыыһатын быраастара КАМАЗ массыынаҕа олоҕурбут көһө сылдьар мэдиссиинэ комплексын туһанан, тэрилтэлэргэ 67, нэһилиэктэргэ 28 айаны былааннаатылар. Бу туһунан Ил Дархан, бырабыыталыстыба пресс-сулууспата суруйар.

“Көһө сылдьар мэдисиинискэй комплексы төгүрүк сыл устата туттабыт. Былырыын быраастарбыт нэһилиэнньэҕэ профилактическай бэрэбиэркэни, диспансеризацияны ыыппыттара. Нэһилиэктэргэ уонна тэрилтэлэргэ 55-тэ сылдьыбыттара», — диэн Намнааҕы КУБ кылаабынай бырааһа Ариан Сергеев кэпсээтэ.

Быйыл бастакынан ыраах сытар Салбаҥҥа тиийбиттэр. Быраастар 363 улахан киһини уонна 38 оҕону бэрэбиэркэлээбиттэр. 193 чинчийиини, ол иһигэр ФЛГ, ЭКГ, УЗИ оҥорбуттар. 55 киһи уопсай диспансеризацияны уонна профилактическай мэдисиинискэй бэрэбиэркэни ааспыттар. Түөрт дьахтарга репродуктивнай доруобуйаларын сыаналыыр диспансеризация ыытыллыбыт.

“Биһиги, Салбаҥ нэһилиэгин олохтоохторо,  маннык тэйиччи сытар нэһилиэккэ быраастар кэлэллэрин улахан суолталааҕынан уонна наадалааҕынан ааҕабыт. Көһө сылдьар мэдисиинискэй комплекска тута анаалыһы ылаллара, быраастар көрөллөрө, вакцинацияны ыыталлара олус бэрт. Улуус киинигэр барарбыт наадата суох буолла», — диэн бэлиэтээтэ Салбаҥ нэһилиэгин олохтооҕо Любовь Касьянова.