Нам Хатыҥ Арыытын оскуолата сонун бырайыактарынан үлэлиэҕэ

Быйылгы үөрэх дьылыгар Нам улууһун И.Е. Винокуров аатынан Хатыҥ Арыы оскуолатыгар үгүс суолталаах тэрээһин ыытыллыаҕа.

Ол курдук, нэһилиэккэ үлэ-хамнас оскуола арыллыбыта — 85,  Улуу Кыайыы  — 80, Хатыҥ Арыы олохтоохторо киэн туттар биир дойдулаахтара, Саха сирин биллиилээх бэйиэтэ, тылбаасчыт И.Д. Винокуров-Чаҕылҕан төрөөбүтэ 110 сылларыгар ананар.

Оскуолаҕа быйыл 344 оҕо үөрэнэр: онтон 32 оҕо — 1-кы кылаас үөрэнээччитэ, 13 оҕо — 11 кылаас үөрэнээччитэ. Быйылгы үөрэх дьылыттан оскуолаҕа «Бары уруһуйдуубут» бырайыагынан өрөспүүбүлүкэтээҕи эспиримиэнниир былаһаакка үлэтин саҕалыаҕа. Алтынньыга Жатайдааҕы тиэхиньукуму уонна Жатайдааҕы суудунаны өрөмүөннүүр собуоту кытта сөбүлэҥ түһэрсиллэн, уолаттарга анал пиирмэннэй кылаас арыллыаҕа. Манна оҕолор көмпүүтэр араас бырагырааматын таҥыы, электрикэ уонна сыбааркалааһын сатабылыгар уһуйуллуохтара. Биир сону сүүрээнинэн Казахстан Алма-Аты экэнэмиичэскэй университетын кытта бииргэ үлэлээһин буолуоҕа. 7-8 кылаастарга черчение, 5-6 кылаастарга Саха сирин норуоттарын култууратын уруоктара ыытыллыахтара. 10-11 кылаастарга информатика, математика уонна нуучча литературатын биридимиэттэрин дириҥэтэн үөрэтиллиэхтэрэ. Физкултуура уруогун иһинэн Арассыыйа дартска чөмпүйүөнэ, РФ успуордун маастара Мария Сивцева дартска эбии дьарыгы ыытыаҕа.  Ону сэргэ оҕолор самбоҕа үөрэниэхтэрэ. Информационнай технологияны сайыннарыыга “Эдэр профессионаллар”  хайысханан үлэ ситимнээхтик барыаҕа. Байыаннай-патриотическай иитиигэ 7-8 кылаас уолаттара “Юнармия”  кууруһун ааһыахтара.

«Буойун» сайыҥҥы лааҕыр үлэтин хайысхатынан Аҕа сүбэтин  тэрийиитинэн байыаннай хомуурдар ыытыллыахтара. Лааҕыр матырыйаалынай-тэхиниичэскэй баазатын хаҥатыыга үлэ тэтимириэҕэ. Кэлэр сылларга  лааҕырга улуус оскуолаларын уолаттарын дьарыктааһын туһунан сүбэлэһии барар.

Улуустааҕы дьаһалта пресс-сулууспата иһитиннэрбитинэн, бэҕэһээ Билии күнүгэр улуус баһылыга Юрий Слепцов эҕэрдэ тылыгар 2024-2025 үөрэх сылыгар Хатыҥ Арыы нэһилиэгин олохтоохторо киэн туттар биир дойдулаахтара, Саха сирин биллиилээх бэйиэтэ, тылбаасчыт И.Д. Винокуров-Чаҕылҕан төрөөбүтэ 110 сыла бэлиэтэнэринэн ураты суолталааҕын  тоһоҕолоон эттэ.  Маны сэргэ, Юрий Слепцов  оҕо сайыҥҥы  сынньалаҥын тэрийиигэ былааннаах үлэ барбытын,  Нам улууһун оҕолоро “Спортивные якутяне” өрөспүүбүлүкэ үөрэнээччилэрин спартакиадаларыгар, “Азия оҕолоро” аан дойдутааҕы спортивнай оонньууларга ситиһиилээхтик кыттыбыттарын,  биир кэлим эксээмэҥҥэ үрдүк баалы ылыы бырыһыана үрдээбитин бэлиэтээн эттэ уонна быйылгы үөрэх дьылыттан БКЭ-ҕэ 90-100 баалы ылбыт оҕолорго, кинилэр учууталларыгар улуус баһылыгын грана олохтоммутун иһитиннэрдэ.

Быйылгы үөрэх дьылыгар  Хатыҥ Арыы  оскуолатыгар 4 эдэр учуутал  үлэлии  кэллэ.   Кинилэргэ кэс тылын РФ үөрэҕириитин Бочуоттаах үлэһитэ Лена Сивцева  анаата.