Нам Хатырыгын үөрэнээччилэрэ “80 үтүө дьыала” аахсыйаны ыыталлар

Бу күннэргэ бары улуустарга, нэһилиэктэргэ Улуу Кыайыы 80 сылын көрсө араас хайысхалаах үлэ ыытыллар.

Быйыл М.К. Аммосов аатынан Хатырык орто оскуолатыгар  Арассыыйаҕа Аҕа дойдуну, өрөспүүбүлүкэҕэ Ийэ дойдуну көмүскээччи, Нам улууһугар Кыайыы сылларынан  “80 үтүө дьыала” аахсыйа биллэриллибитэ. Онон оскуола оҕолоро сыл устата  80 үтүө бачыымнаах үлэни ыытарга былаанныыллар.   “Нам улууһа”  МТ пресс-сулууспата иһитиннэрбитинэн, бэҕэһээ, кулун тутар 12 күнүгэр, 8-11 кылаас үөрэнээччилэрэ  Кыайыы  искибиэрин  хаарын ыраастаатылар.

Бу күнтэн ыла оҕолор  анал байыаннай дьайыы кыттыылаахтарыгар, кинилэр дьиэ кэргэттэригэр, бэтэрээннэргэ, аҕам саастаах дьоҥҥо  күүс-көмө, өйөбүл  буолан, тиэргэннэрин хаарын күрдьүөхтэрэ, ыраастыахтара.