Нам оройуонугар ууга түспүт эр киһини көрдүүллэр

Саха сиринээҕи Быыһыыр сулууспатын водолазтара Нам оройуонугар эр киһини көрдүүллэр.

Кини Граф Биэрэгэ сэлиэнньэ аттыгар үрэххэ оҥочоттон түспүт. Быыһыыр сулууспаҕа иһитиннэрии бэс ыйын 11 күнүгэр киирбит.

Мотуордаах оҥочоттон ууга үс эр киһи түспүт эбит, икки киһи ууттан тахсыбыттар, оттон үһүс киһи сүппүт. Бэҕэһээ ГИМС, ИДьМ иниспиэктэрдэрэ көрдүүр үлэни ыыттылар.

Бүгүн, бэс ыйын 12 күнүгэр, Дьокуускайтан Нам оройуонугар быыһыыр сулууспа водолазтарын бөлөҕө таҕыста. Көрдүүр үлэлэр гидролокатор көмөтүнэн ыытыллаллар.

«Быһылаан тахсыбыт сириттэн үрэх устун чинчийэн көрөбүт», — диэн водолазтар старшай бөлөҕө Алексей Белин быһаарда.

Көрдөөһүҥҥэ аҕыс киһи хабылынна: быыһыыр сулууспа түөрт водолаза, госиниспиэктэр, ГИМС Нам учаастагын патрульнай катерын капитана, олохтоохтор.