Нам Партизаныгар ыһыахха сэбиэскэй үлэ маяктарын чиэстээтилэр

Бу күннэргэ улуустар кииннэригэр уонна нэһилиэктэргэ  уйгу-быйаҥ ыһыахтар буола тураллар. 

Быйыл Үлэ уонна Педагог-уһуйааччы сыллара буолан, ыһыахтар ис хоһоонноро бу суолталаах тиэмэлэргэ ананна. Нам улууһун Партизан нэһилиэгэр бэс ыйын 16 күнүгэр Үлэ сылыгар анаммыт олус дириҥ ис хоһоонноох нэһилиэк ыһыаҕа ыһылынна. Бу туһунан олохтоох дьаһалта баһылыгын солбуйааччы Полина Скрябина  маннык кэпсээтэ:

— Уйгу-быйаҥ ыһыахпыт иннинэ олохтоохторбутун көҕүлүүр анал килиип оҥорон бассаабынан ыыппыппыт. Онно «Нам» сопхуос  Партизан отделениетын үлэһиттэрин чиэстиир параат, сэбиэскэй кэм агитбиригээдэтин кэнсиэрэ буоларын иһитиннэрбиппит.

«Романтика»,  «Огдуун», «Кубалаах»,  «Комсомол 17-с сийиэһэ», «Кэскил»   пиэрмэлэр үлэһиттэрэ оччолорого — көхтөөх хомсомуол ыччат дьон этилэр.

Билигин сэбиэскэй кэминээҕи үлэ маяктара дьон  — үлэ бэтэрээннэрэ. Ол кэмнээҕи  бастыҥ ыанньыксыттар, ньирэй көрөөччүлэр, мэхэньисээтэрдэр уонна  тырахтарыыстар эрчимнээхтик параадтаан киирдилэр.

  Урукку пиэрмэ үлэһиттэрэ  бэйэлэрин кыахтарынан күрэхтэһэн ыллылар, ырыаны уонна үҥкүүнү көҕүлүттэн туттулар, түһүлгэни киэргэттилэр. Сэбиэскэй кэмнээҕи былакааттар, транспарааннар ыйанан, үгүс дьон эдэр саастарыгар төннөн ыллылар.

Тэрээһини  уордьаннаах киэн туттар дьоммут дьиэ кэргэттэрэ Валентина Мордосова, Ефросиния Илларионова, Ирина Саввина, Герман Алексеев, Василий Яковлев, Егор Протопопов, Алексей Парников спонсордаан тэрийдилэр. 
 Спортивнай күрэхтэһиини Иван Саввинов, Дьулус Охлопков, Зафар Асоев спонсордаан өйөөтүлэр. 

Ити курдук, Партизан нэһилиэгин ыһыаҕар ыраахтан-чугастан ыалдьыт мустан, олохтоохтор сүргэлэрэ бэркэ көтөҕүллэн, уйгу-быйаҥ ыһыаҕын ыстылар.