Нам Түбэтигэр Николай Дьяконов аатынан уулусса баар буолла

Физкультурник күнүн көрсө Нам улууһун Түбэ нэһилиэгэр саха ааттаах-суоллаах күрэсчитэ,  «Дыгын оонньууларын» 6 төгүллээх кыайыылааҕа Николай Дьяконов аатынан уулусса үөрүүлээхтик арылынна.

Тэрээһиҥҥэ Ил Түмэн бэрэссэдэтээлэ Алексей Еремеев, Нам улууһун баһылыга Юрий Слепцов, Хатас агрооскуолатын дириэктэрэ Николай Слепцов, «Дыгын оонньууларын» 6 төгүллээх спонсора, “Проресс” ХЭТ генеральнай дириэктэрэ  Алексей Пинигин, «Дыгын оонньууларын» үс төгүллээх кыайыылааҕа Иннокентий Макаров, СӨ Тырааныспар суолларын управлениетын генеральнай дириэктэрин бастакы солбуйааччы Егор Ефимов, “Түбэ” тыа сирин түөлбэтин баһылыга Григорий Гуляев, «Уйгу-Быйаҥ» ХЭТ генеральнай дириэктэрэ Владимир Сивцев, Николай Дьяконов оҕолоро, уола, «Дыгын оонньууларын» 2023 сыллаах кыайыылааҕа Вячеслав Дьяконов, бырааттара —  «Дыгын оонньууларын» хас да төгүллээх призера Артем Варданян, мас тардыһыыга VI аан дойду чөмпүйэнээтин бэтэрээннэргэ чөмпүйүөнэ Анатолий Гладков,   уруу-аймах дьоно,  Түбэ нэһилиэгин дьоно-сэргэтэ кыттыыны ыллылар.

Улуус дьаһалтатын пресс-сулууспата иһитиннэрбитинэн, быйыл Түбэ нэһилиэгин бэрэстэбиитэлээх уорганын дьокутааттара уочараттаах сиэссийэлэригэр боотурдар үөскээн-төрөөн тахсыбыт ытык сирдэригэр, Түбэҕэ киириигэ турар суолга, Николай Дьяконов аатын иҥэрэр туһунан быһаарыыны таһаарбыттара. Бу маннык улахан  суолталаах хамсааһын улуус  устуоруйатыгар кыһыл көмүс буукубанан сурулунна. Тыл этээччилэр 21-с үйэ чулуу күрэсчитэ Николай Дьяконов успуорка сүдү кылаатын бэлиэтээн туран, махтал тылларын тиэртилэр.

Түбэҕэ Боотурдар искибиэрдэрин тутарга былаанныылларын нэһилиэк баһылыга Григорий Гуляев иһитиннэрдэ.  Ити курдук, Нам улууһун чулуу күрэсчитэ, «Дыгын оонньууларын» 6 төгүллээх кыайыылааҕа Николай Викторович Дьяконов аата үйэлэргэ үйэтитилиннэ.