«Нам улууһа Кыайыы суолунан» аахсыйа

Улуу Кыайыы 80 сылын көрсө былаан быһыытынан Нам улууһугар араас хабааннаах тэрээһиннэр ыытыллаллар. Ол чэрчитинэн кулун тутар 18 күнүттэн нэһилиэнньэҕэ духуобунай өй-санаа уонна патриотическай санааны бөҕөргөтүү, история үгэстэрин харыстыыр сыаллаах «Нам улууһа Кыайыы суолунан» аахсыйа саҕаланна.

Аахсыйа Арбын уонна Хатырык нэһилиэктэригэр ыытыллан олохтоохтор сэҥээриилэрин ылла. Тэрээһиннэр саҕаланыыларыгар улуус баһылыгын социальнай боппуруостарга солбуйааччы Юрий Дьяконов, Арбын, Хатырык нэһилиэктэрин баһылыктара эҕэрдэ тыллары эттилэр.
Арбыҥҥа Анастасия Алексеева салайааччылаах оскуола үөрэнээччилэрин бөлөҕө литературнай дьүһүйүү көрдөрдүлэр. Хатырыкка олохтоох библиотека үлэһитэ нэһилиэккэ олорор тыыл бэтэрээннэрин, сэрии сылларын оҕолорун туһунан кэпсээтэ, үбүлүөйдээх сылы көрсө нэһилиэккэ ыытыллар үлэлэр тустарынан иһитиннэрии оҥордо.
П.И. Сивцев аатынан Намнааҕы история уонна этнография түмэлин быыстапка саалатын сэбиэдиссэйэ Рустам Федоров «Музей в чемодане»  экспонаттарын көрдөрө-көрдөрө кэпсээн, олохтоохтор интэриэстэрин тарта. Салгыы түмэл видеоархыыбын үлэһиттэрэ бэлэмнээбит Нам оройуонун дьоно-сэргэтэ Аҕа дойду сэриитин кэминээҕи олохторун, үлэлэрин кэпсиир документальнай киинэ көһүннэ. «Движение первых» Россия оҕо уонна ыччат хамсааһынын Намнааҕы салаатын салайааччыта Анна Ядрихинская, улуустааҕы үөрэх управлениетын исписэлииһэ Юлия Жергина «Песни военных лет» музыкальнай лото-оонньууну ыыттылар. А.Ф. Шестаков аатынан улуустааҕы норуот айымньытын дьиэтин «Коробейники» нуучча ырыатын народнай ансаамбылын салайааччыта Дмитрий Барабанов байыаннай кэм ырыаларын ыллаан тэрээһин ис хоһоонун, суолтатын дириҥэттэ.

Олохтоох библиотека үлэһиттэрэ Улуу Кыайыыны уһансыбыт  биир дойдулаахтарын тустарынан суруллубут үйэлээх кинигэлэринэн быыстапка туруорбуттар.
Тэрээһин кыттыылаахтара
биир дойдулаахпыт И.Д. Винокуров — Чаҕылҕан «Хайыһар» ырыатын сүһүөххэ туран бары биир тыынынан ыллаатылар.

Нэһилиэктэргэ «Нам улууһа Кыайыы суолунан» аахсыйа оһуохайынан түмүктэннэ.
Арбын уонна Хатырык олохтоохторо тэрээһинтэн астыммыттарын, оскуола оҕолорун, ыччаты патриотическай тыыҥҥа иитиигэ туһалаах тэрээһин буолбутун этэн туран махтал тыллары эттилэр. Аахсыйа сыалын-соругун ситтэ уонна график быһыытынан улуус нэһилиэктэринэн салҕанар.

«Нам улууһа» МО пресс-сулууспата