Нам улууһугар Агростартап куонкуругар сайаапкалары туталлар

Нам улууһугар үп-харчы ылыан баҕалаах дьонтон докумуоннары тутуу атырдьах ыйын 12 күнүттэн балаҕан ыйын 11 күнүгэр диэри “Электроннай бүддьүөт” систиэмэтинэн электроннай көрүҥүнэн туталлар.

Бу туһунан дьаһалта пресс-сулууспатыгар улуустааҕы тыа хаһаайыстыбатын управлениетын салайааччытын солбуйааччы Юрий Петров маннык иһитиннэрдэ:

— Арассыыйа бэрэсидьиэнэ Владимир Путин көҕүлээһининэн «Дьоҕус уонна аччыгый  урбаан уонна биирдиилээн урбаанньыттар бачыымнарын өйөөһүн» национальнай бырайыак чэрчитинэн саҥа үлэлээн эрэр уонна саҥа саҕалааччы пиэрмэрдэри өйүүр федеральнай бырайыак 2019 сылтан саҕалаан үлэлиир.

Куонкуруһу СӨ тыатын хаһаайыстыбатын уонна ас-үөл бэлиитикэтин министиэристибэтэ тэрийэн ыытар. Анал хамыыһыйа сайаапкалары балаҕан ыйын 22-27 күннэригэр көрөн кыайыылаахтары быһаарыаҕа. Билигин  докумуоннары, сайаапкалары хомуйуу, биисинэс-бырайыак суруйуу үлэтэ салҕанар. Партизантан, Модуттан, Бөтүҥтэн, Үөдэйтэн, Никольскайтан, Хамаҕаттаттан киирбит сайаапкалартан көрдөххө, дьон сүөһү, сылгы иитиитинэн, хортуоппуй үүннэриитинэн дьарыктаныан баҕалаахтар.

Тыа хаһаайыстыбатын министиэристибэтигэр быһаарбыттарынан, кыайыылаахтар хаһаайыстыбаны сайыннарыы хайысхатыттан тутулуктанан 1,5-тан 8 мөл. солк. диэри көмө харчы ылыахтара, маныаха бэйэлэригэр бырайыак 10% кырата суох суумалаах буолуохтаахтар.