Нам улууһугар өрөспүүбүлүкэтээҕи бэлисипэдиистэр бастакы сүлүөтэ буолла

Нам улууһугар атырдьах ыйын 29-30 күннэригэр бастакы өрөспүүбүлүкэтээҕи бэлисипэдиистэр сүлүөтэ киэҥ бырагыраамалаах ыытылынна.

Сүлүөккэ Саха сирин бары биллэр бэлисипэдиистэрэ, бэлисипиэд успуордун спортсменнара уонна туристара кыттыыны ыллылар. Ол курдук, СӨ бэлисипэдиистэрин уопсастабыннай кулууптара, түмсүүлэрэ – Намтан «Намвел» бэлиспиэд кулууба, Чурапчыттан «Дьулуур» түмсүү, Дьокуускайтан «ВелОса» түмсүү, Уус Алдан бэлисипэдиистэрин бөлөҕө, «Дьокуускай куорат бэлисипэдиистэрэ» түмсүү, уопсайа 6 бэлисипиэд кулууба айаннаан кэллэ. Бу туһунан «Спорт Нам» ТГ-ханаала суруйар.

Тэрээһин сүрүн сыалынан  өрөспүүбүлүкэ саҥа атаҕар туран эрэр бэлисипэдиистэрин хамсааһыннарын (успуорт, туризм) сайдар суолун торумнааһын буолла.  Саамай улахан 10 киһилээх дэлэгээссийэ, Чурапчыттан “Дьулуур” бэлисипэдиистэрэ кулууптара кэлэн көхтөөх кыттыыны ылла. Кинилэр истэригэр саамай аҕа саастаах кыттааччы, 76 саастаах бэтээрээн Анатолий Сивцев кытынна. Сүлүөт олус интэриэһинэйдик, киэҥ ис хоһоонноохтук ыытылынна. Тэрээһин биир ситиһиитинэн Нам улууһун «Намвел»  кулууба уонна Чурапчы улууһун «Дьулуур» түмсүүлэрэ бииргэ үлэлээһин сөбүлэҥэр илии баттаһыылара буолла. Сүлүөт түмүгүнэн өрөсөлүүссүйэ ылыныллан, бэлисипиэд хамсааһыннарын сайдыытыгар бастакы олук оҥоһулунна.