Нам улууһугар «Библионочь-2024» Дьиэ кэргэн сылыгар ананна

Ыам ыйын 17 күнүгэр Нам улууһугар «Библионочь-2024» Бүтүн Арассыыйатааҕы аахсыйа Арассыыйаҕа Дьиэ кэргэн сылын чэрчитинэн ыытылынна.

2012 сылтан сыл аайы тэриллэр Бүтүн Арассыыйатааҕы аахсыйа дойдуга дьоһун суолталаах култуура тэрээһининэн буолла.
Аахсыйа чэрчитинэн бу күн I Хомустаах сэлиэнньэтин «Эйгэ» федеральнай модельнай саҥа көлүөнэ бибилэтиэкэтигэр буолбут «Биир ыалтан үс суруйааччы» диэн көрсүһүүнү Сунтаар улууһун Кутана сэлиэнньэтиттэн төрүттээх үс суруйааччы: Валериан Парфеньевич Николаев, Галина Васильевна Нельбисова уонна Надежда Парфеньевна Егорова айар үлэлэригэр анаатылар. Ааҕааччылардыын көрсүһүүгэ Суруйааччылар сойуустарын чилиэннэрэ Галина Нельбисова уонна Надежда Егорова-Намылы кытыннылар. Тэрээһини Сынньалаҥ киинин дириэктэрэ Анна Григорьевна Мылаханова бэрт сэргэхтик ыытта.
Надежда Дмитриевна Жиркова салайааччылаах саҥа кэм бибилэтиэкэтэ куруук да кэрэхсэбиллээх тэрээһиннэри толкуйдаан, дьонун-сэргэтин кэрэ эйгэтигэр түмэр. Бүгүҥҥү «Библионочь» аахсыйаҕа кэлбит дьоҥҥо анаан аралдьытар тэрээһиннэр, маастар-кылаастар, быыстапкалар, оонньуулар буоллулар. Хаартыскаҕа түһэрэр бэртээхэй зона, араас муннуктар тиэмэлэринэн наарданан оҥоһуллубуттар. Холобур, биир муннукка кинигэлэри кэккэ араҥаҕа арааран уурбуттара киһи хараҕар быраҕыллар уонна киһини соһутар, толкуйга түһэрэр. Манна «Книга-спрос», «Книга-ретро», «Незаслуженно забытая книга», «Книга-тяжоловес», «Книга-загадка» уо.д.а. долбуурга  ууруллубут кинигэлэри көрөн баран, ити кинилэр тоҕо чуолаан ити долбуурга «түбэспиттэрин» билиэххин, ааҕыаххын баҕараҕын. Ол да иһин,  Надежда Дмитриевна ол төрүөтүн кыратык сэгэтэн ылан, ааҕааччыны ааҕыы эйгэтигэр киллэрдэ…

Ону таһынан «Дьиэ кэргэн эргимтэтэ» литературнай оонньуу, үөрэнээччилэргэ «Мин уонна мин дьиэ кэргэним» стрит-артер, «Айар куттаах ураты дьиэ кэргэн» быыстапка (Баишевтар, Поповтар), «Эбэлээх эһээбит күндү маллара» ретро-быыстапка (С.Н. уонна А.И.Копыриннар), Татьяна, Есения Жирковалар «Туой чыычаах» айар мастырыскыайдара буоллулар. «Библионочь-2024» 5-8 кылаас үөрэнээччилэригэр аналлаах «Книж-движ» дискотеканан түмүктэннэ.

Быһаарыы:
2020 сыллаахха «Култуура» национальнай бырайыагы олоххо киллэрии чэрчитинэн,  Арассыыйа Федерациятын субъектарын  сэлиэнньэлэригэр модельнай муниципальнай бибилэтиэкэлэри тэрийэргэ куонкурус биллэриллибитэ. Дойду 56 субъегыттан 190-тан тахса бибилэтиэкэ сайаапка түһэрбитэ. Кыайыылаахтар ортолоругар I Хомустаах бибилэтиэкэтэ -– Нам улууһун киин бибилэтиэкэтин ситимин 2 нүөмэрдээх салаата киирбитэ. Онон, Нам улууһугар саҥа көлүөнэ бастакы бибилэтиэкэтинэн буолуу улахан ситиһии этэ.
«Эйгэ» саҥа көлүөнэ бибилэтиэкэтэ улахан өрөмүөн уонна саҥардыы үлэтин кэнниттэн 2021 сыл олунньу 26 күнүгэр аһыллан, ситиһиилээхтик үлэлии-хамсыы олорор. Кинилэрдиин уопут атастаһаары өрөспүүбүлүкэ араас улуустарыттан ыалдьыттыыллар, атын бибилэтиэкэлэргэ тиксибэт сэдэх кинигэни ааҕа, уларса кэлэллэр.