Нам улууһугар муниципальнай быыбарга бэлэмнэнэллэр

Балаҕан ыйын 14 күнүгэр, баскыһыанньаҕа, Нам улууһугар  муниципальнай таһымнаах быыбар ыытыллар. Бу күн быыбардыыр учаастактар 8:00-20:00 ч.  үлэлиэхтэрэ диэн Нам улууһун дьаһалтатын пресс-сулууспата иһитиннэрэр.

Маймаҕа, Бөтүҥ, Көбөкөн нэһилиэктэрин олохтоохторо баһылыктарын быыбардыахтара. Маймаҕа нэһилиэгин баһылыгар 3, Бөтүҥҥэ 3, Көбөкөҥҥө 2 хандьыдаат турда. Мантан олохтоохтор нэһилиэктэригэр биирдии хандьыдааты талыахтара.

Партизаҥҥа, Маймаҕаҕа, Көбөкөҥҥө, Искраҕа, Хатырыкка олохтоохтор Нэһилиэк сэбиэтин дьокутаатын быыбардыахтара.

Маны таһынан, Улуус дьокутааттарын сэбиэтигэр эбии быыбарга:  Хамаҕаттатааҕы икки мандааттаах 3 №-дээх уонна 8 №-дээх «Нэлэгэр» биир мандааттаах быыбардыыр уокуруктарыгар «Нам улууһа» муниципальнай оройуон Мунньаҕар дьокутааттары талыахтара.

«Нам улууһа» муниципальнай оройуон мунньаҕар дьокутаакка Хамаҕаттатааҕы икки мандааттаах 3 №-дээх быыбардыыр уокуругар 3, 8 №-дээх «Нэлэгэр» биир мандааттаах быыбардыыр уокуругар 3 хандьыдаат турда.

Антонина Корнилова, Намнааҕы территориальнай быыбар хамыыһыйатын бэрэссэдээтэлин э.т.:

— Учаастактааҕы хамыыһыйалар үлэлэрин атырдьах ыйын 30 күнүттэн саҕалаабыттара. Балаҕан ыйын 1-2 күннэригэр бүлүтүөннэр учаастактааҕы хамыыһыйаларга тарҕаммыттара. Эрдэ куоластааһын (предварительное голосование) балаҕан ыйын 3 күнүттэн саҕаламмыта уонна 13 күнүгэр диэри салҕанан барар. Балаҕан ыйын 10 күнүн туругунан, эрдэ 28 быыбардааччы куоластаата. Быыбар агитацията, быыбар саҕаланыан биир күн иннинэ, ол эбэтэр балаҕан ыйын 12 күнүгэр, түүн 24:00 ч. түмүктэнэр. Кэтээн көрөөччүлэр (наблюдатели) испииһэктэрэ бэҕэһээ, балаҕан ыйын 10 күнүнэн, оҥоһуллан түмүктэннэ. Намнааҕы территориальнай, учаастактааҕы быыбардыыр хамыыһыйалар, тустаах тэрилтэ үлэһиттэрэ бары быыбар этэҥҥэ, сокуону тутуһан ааһарыгар үлэлииргэ бэлэмнэр.