Нам улууһугар сааскы халаан содулун туоратар үлэлэр салҕаналлар

Бэҕэһээ, бэс ыйын 30 күнүгэр, сааскы халаан уутун содулун чөлүгэр түһэрии үлэтин чэрчитинэн Нам улууһун баһылыга Юрий Слепцов өрүс нөҥүө сытар Фрунзе, Көбөкөн, Арбын нэһилиэктэригэр үлэлээтэ.

Кинини кытта улуустааҕы үөрэх управлениетын начаалынньыгын солбуйааччы Светлана Поротова сырытта диэн Нам улууһун дьаһалтатын пресс-сулууспата иһитиннэрэр. Бастаан Фрунзетааҕы маҥнайгы сүһүөх оскуола-оҕо уһуйаанын көрдүлэр. Оскуола-уһуйаан хаһаайыстыбатын сэбиэдиссэйэ Василий Парников уонна Фрунзе нэһилиэгин баһылыга Роман Трофимов туох үлэ барыахтааҕын кэпсээтилэр.

Манна халаан уута муоста аннынан кэлбит буолан, сабараанньатын, акылаатын саҥардыы үлэтэ ыытыллыахтаах. Юрий Иннокентьевич түргэнник биригээдэ булан, субуотунньук тэрийэн, үлэни ыыта охсоллоругар сорудахтаата.
Салгыы Көбөкөн нэһилиэгэр тиийдилэр. Олохтоох дьаһалта кылаабынай исписэлииһэ Фекла Бугаева уу хайдах курдук алдьатыылаахтык кэлэн барбытын көрдөрөн кэпсээтэ. Онтон оскуоланы уонна интернаты көрдүлэр. Оскуолаҕа хапытаалынай өрөмүөн чэрчитинэн бастакы этээскэ киин ититии ситимэ уонна спортивнай саала үрдэ саҥардыллыахтаах, толору хааччыллыы оҥоһуллуохтаах. Оттон интернат сарайа, түннүктэрэ саҥардыллан, тас бүрүөһүнэ оҥоһуллубут. Кыра хаалбыт үлэлэр түмүктэниэхтээхтэр диэн оскуола дириэктэрэ Сергей Иннокентьев иһитиннэрдэ.

Күн иккис аҥаарыгар Арбын нэһилиэгэр тутулла турар элбэх кыбартыыралаах дьиэлэри көрдүлэр. Юрий Иннокентьевич манна бытаарыы тахсыбытын, ол эрэн бу сылга үлэни хаачыстыбалаахтык, кэмигэр ыытан түмүктүүллэригэр эттэ. Нэһилиэк баһылыгар Игорь Гоголевка үлэни күүскэ хонтуруоллууругар тоһоҕолоото.
Ол кэннэ нэһилиэнньэни кытта көрсүһүү тэрилиннэ.

Олохтоохтор быйылгы халаан уутугар хаһан да маннык улахан көмө оҥоһуллубатаҕын бэлиэтээн туран, махтал тылларын эттилэр. Улаханнык ууга эмсэҕэлээбит Маймаҕа уонна Хатырык олохтоохторо балаһыанньаларын туоһуластылар. Дьиэлэрин өрөмүөнүн хайдах быһыылаахтык дьаһанан ыыталларын ыйыттылар. Маныаха баһылык Юрий Слепцов тутуу матырыйаалын бары биир сиртэн ылан баран, куораттан тиэйэн аҕалыыга улуус көмөлөһүө диэн эппитин бары сэргии иһиттилэр. Юрий Иннокентьевич чөлүгэр түһэрии үлэлэр кэмигэр сөпкө ыытыллан олохпут оннун булуо, барыта этэҥҥэ буолуо диэн көрсүһүүнү түмүктээтэ.