Нам улууһугар сокуоннайа суох үлэни бохсор бөлөх мунньахтаата

СӨ Бырабыыталыстыбатын дьаһалыгар олоҕуран, Нам улууһугар сокуоннайа суох үлэни бохсор  бөлөх тэриллибитэ.

Бөлөх салайааччыта – улуус баһылыга Юрий Слепцов, солбуйааччыта – баһылыгы социальнай боппуруостарга солбуйааччы Юрий Дьяконов.

Нам  улууһун дьаһалтатын пресс-сулууспата иһитиннэрбитинэн, бүгүн, ыам ыйын 13 күнүгэр, Юрий Дьяконов ыыппыт мунньаҕар улуустааҕы дьарыктаах буолуу киин, РФ социальнай пуондатын Намнааҕы килийиэннэри кытта үлэлиир  сулууспа, Намнааҕы Биисинэс-киин, «Мин биисинэһим», экэниэмикэ уонна юридическай управлениелар салайааччылара кыттыыны ыллылар. Бөлөх сүрүн соруга – урбаанньыттарга, бааһынай хаһаайыстыбаларга, дьоҕус тэрилтэлэргэ, юридическай уонна физическэй сирэйдэргэ үлэ бырааба кэһиллибитэтин туһугар сокуон хараҕынан сөптөөхтүк сэрэтэр-өйдөтөр үлэни ыытыы. Мунньах кыттыылаахтара үлэ былаанын торумнаатылар.

Ыам ыйын 20 күнүгэр Бастакы Хомустаах, Партизан, Никольскай уонна Хамаҕатта нэһилиэктэригэр бөлөх айана тэриллиэҕэ. Манна тустаах тэрилтэ салайааччылара, урбаан эйгэтин үлэһиттэрэ, биирдиилээн дьон эмиэ кыттыһыахтарын сөп.