Нам улууһугар суол саахала таҕыста

Түүнүн номнуо тоҥорор буолан, тимир көлөлөөхтөргө кутталлаах буолла. Муус устар 12 күнүгэр күнүс 13:49 чааска Нам улууһун ИДьМ дьуһуурунай чааһыгар 137 км суол саахала тахсыбытын туһунан иһитиннэрии киирбит.

1972 с.т. суоппар  «TOYOTA LAND CRUISER» мааркалаах массыынанан «Нам» суолун 136 км саахалга түбэстэ диэн ГИБДД пресс-сулууспата иһитиннэрэр.

Кини Дьокуускай куораттан Кэбээйи улууһугар балыктыы айаннаан иһэн, халтарытан үрдүк суолтан туораата, ону кытта сыаналаах омук массыыната түҥнэһиннэ. Бэрэбиэркэ түмүгүнэн суоппар арыгы испэтэҕэ чуолкайданна.

Саахал түмүгэр икки киһи эмсэҕэлээтэ.

1969 с.т. эр киһи элбэх эчэйиилээх Намнааҕы киин балыыһа  реанимационнай отделениетыгар киирдэ. Суол быһылаанын кэмигэр  кини массыынаҕа кэнники сидиэнньэҕэ олорбут, куттал суох буолуутун хааччыйар курун баамматах.

1965 с.т. эр киһи  ойоҕоһун ууҥуоҕун  тоһуппут. Кини амбулаторнай эмтээниигэ ананна. Суол быһылаанын кэмигэр   массыынаҕа эмиэ кэнники сидиэнньэҕэ олорбут, куттал суох буолуутун хааччыйар курун баамматах.