Нам улууһугар сүппүт аҕам саастаах эр киһини көрдөөһүн салҕанар

Нам улууһун Кириэс-Кытыл сэлиэнньэтигэр сүппүт 81 саастаах эр киһи көстө илик. Бу туһунан балаҕан ыйын 3 күнүгэр Саха сиринээҕи Быыһыыр сулууспата иһитиннэрдэ.

«Сүппүт эр киһи эбии суола-ииһэ көстүбэтэ. Икки уол  үрэх түгэҕин чинчийдилэр, атыттар кытылы кэрийэн көрдүлэр. Көрдөөһүн салҕанар», — диэн Намнааҕы хонтуруоллуур-быыһыыр пуос салайааччыта Константин Федоров кэпсиир.

Көрдөөһүҥҥэ 26 киһи кыттар, ол иһигэр Дьокуускайтан көмөҕө кэлбит үс быыһааччы баар. Балаҕан ыйын 2 күнүн түүнүгэр сүппүт киһини тепловизордаах квадрокоптер көмөтүнэн көрдөөбүттэрэ.

Санатан эттэххэ, кулгааҕынан үчүгэйдик истибэт инбэлиит аҕам саастаах балаҕан ыйын 1 күнүгэр дьиэтиттэн маҕаһыыҥҥа тахсан баран төннүбэтэх. Сарсыныгар көрдүүр бөлөх үрэх аттыттан кини ырбаахытын булбута.