Нам улууһугар сүппүт биэнсийэлээх өлүгүн буллулар

Нам улууһун Кириэс-Кытыл сэлиэнньэтигэр балаҕан ыйын 1 күнүгэр сүппүт 81 саастаах киһини көрдөөһүн түмүктэннэ. Эр киһи өлүгүн көрдөөһүҥҥэ чэппиэргэ кыттыспыт водолазтар үрэх таһыттан буллулар диэн балаҕан ыйын 4 күнүгэр Саха сиринээҕи Быыһыыр сулууспа иһитиннэрдэ.

«Эр киһи өлүгүн бэсиһин ууга киирии кэмигэр буллубут. Бу үрэх уу таһыма түспүтүнэн өрүстэн быстыбыт эбит, ол иһин манна сүүрүгэ суох. Бу сири урут чинчийбэтэхтэрэ, сэлиэнньэттэн быһа холоон 1 км тэйиччи сытар. Киһи өлүгэ үрэх кытылыгар сытара», — диэн Саха сиринээҕи Быыһыыр сулууспатын водолазтарын бөлөҕүн салайааччыта Станислав Соломахин кэпсээтэ.

Быыһааччылары, полиция, олохтоох дьаһалта үлэһиттэрин уонна волонтердары кытыннаран киэҥ далааһыннаах көрдөөһүн үлэтэ балаҕан ыйын 2 күнүттэн ыытыллыбыта. Эр киһи сүппүт күнүгэр биир дойдулаахтара кырдьаҕаһы бэйэлэрэ көрдөөбүттэрэ. Көрдүүр үлэ биир да мүнүүтэ тохтооботоҕо – сэлиэнньэ тулатынааҕы хонуулар уонна тыалар чинчийиллибиттэрэ. Быыһааччылар волонтердары кытта хас биирдии быраҕыллыбыт тутууну көрдүлэр. Түүн тепловизордаах квадрокоптер туһаныллыбыта. Үрэх түгэҕэ эмиэ чинчийиллибитэ.