Нам улууһугар «Улуу Кыайыы күнүгэр диэри 100 хонук» диэн тэрээһин буолан ааста

Бэҕэһээ, тохсунньу 29 күнүгэр, Нам улууһун М.К. Аммосов аатынан Култуура уонна духуобунай сайдыы дыбарыаһыгар дойдуга Аҕа дойдуну көмүскээччи, Саха сиригэр Ийэ дойдуну көмүскээччи уонна улууска Кыайыы сылларын аһылыытыгар аналлаах «Улуу Кыайыы күнүгэр диэри 100 хонук» диэн тэрээһин буолан ааста.

Тэрээһин театральнай дьүһүйүүнэн саҕаланна диэн Нам улууһун дьаһалтатын пресс-сулууспата иһитиннэрэр.

Бэлиэ тэрээһиҥҥэ Ил Түмэн бэрэссэдээтэлэ Алексей Еремеев, улуус дьокутааттарын сэбиэтин бэрэссэдээтэлэ Алексей Винокуров, улуус бэтэрээннэрин сэбиэтин бэрэссэдээтэлэ Софья Кобякова, РФ борокуратууратын бэтэрээнэ, юстиция полковнига, сэрии уонна үлэ бэтэрээнин өрөспүүбүлүкэтээҕи сэбиэтин бэрэссэдээтэлин солбуйааччыта Никита Ноев, о.д.а. кытыннылар.

Улуус баһылыга Юрий Слепцов 2024 сылга ыытыллыбыт үлэни-хамнаһы, ситиһиилэри кылгастык кэпсээтэ. Улуус дьоно-сэргэтэ түмсүүлээх, сомоҕолоһуулаах буолан барыны барытын кыайан-хотон, чыпчааллары дабайан кэллэ диэн иһитиннэрдэ. Бу сылга улууска Кыайыы сылынан биллэрилиннэ. Онон, хас биирдии киһи олоҕор, үлэтигэр, туохха барытыгар кыайыылаах-хотуулаах, инникигэ эрэллээх буоллун диэн баҕа санаатын тиэртэ.

Ил Түмэн бэрэссэдээтэлэ Алексей Еремеев бүгүҥҥү тэрээһиҥҥэ элбэх оҕо, ыччат кэлбитэ кэрэхсэбиллээх, үүнэр көлүөнэҕэ сэрии уодаһыннаах сылларын, билигин буола турар байыаннай дьайыыны сөптөөхтүк өйдүөхтээхтэр диэн эттэ. Эйэлээх олоҕу турууласпыт дьоммутун кэриэстээн, кинилэр биһиэхэ оҥорбут үтүөлэрин салҕаан үлэҕэ-үөрэххэ ситиһиилээх, бары өттүнэн кыахтаах буолуохтаахпытын тоһоҕолоон бэлиэтээтэ.

Тыл эппит аҕа көлүөнэ дьон быйылгы сылга үлэлэр ситиһиилээх, үтүө түмүктээх, таһаарыылаах буолалларыгар баҕардылар. Уоттаах сэриигэ охтубут, тыылга уһансыбыт ытык дьоммут ааттарын, олохторун үйэтитиигэ түмсүүлээхтик үлэлиэххэ диэн ыҥырдылар. Ону таһынан анал байыаннай дьайыыга сылдьар байыастарга көмөлөһөрбүт кыайыыга улахан хардыы буоларын эттилэр.