Нам улууһугар урбаанньыттарга аадырыстаах көмө оҥордулар

Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит урбаанньыттартан киирбит сайабылыанньалары көрөн, быһаарыы таһааран тустаах көмө оҥоһулунна.

Бу туһунан Намнааҕы биисинэс-инкубатор салайааччытын солбуйааччы Василиса Стручкова улуус дьаһалтатын телеграм-ханаалыгар маннык иһитиннэрдэ:

— Нам улууһун социальнай-экэнэмиичэскэй сайдыытын пуондатыттан көмө харчы көрүллэн, биэс урбаанньыкка: Надежда Власоваҕа (Граф Биэрэгэ), Василий Стручковка (Граф Биэрэгэ), Анисия Игнатьеваҕа (Хатырык), Николай Лебедевка (Маймаҕа), Намина Гуляеваҕа (Хатырык) — тоҥорор ларь уонна Петр Прокопьевка (Хатырык) бэкээринэтигэр биир туонна үрдүк суортаах бурдук атыылаһан туттардыбыт. 

Нам улууһун урбаанньыта Александр Амбросьев дуогабарынан көмөнү Дьокуускай куораттан тиэйэн таһааран урбаанньыттарга тиэртэ.