Нам улууһугар «Воин» байыаннай хомуур үһүс сылын үлэлиир

«Воин» түмсүү көҕүлээһининэн Нам улууһугар байыаннай-хонуу хомуура үһүс сылын үлэлиир. Манна араас нэһилиэктэртэн уолаттар мустаннар дьиҥнээх эр киһилии иитиини ааһаллар диэн Нам улууһун дьаһалтаттын пресс-сулууспата иһитиннэрэр.

«Воин» түмсүү салайааччыта Павел Оконешников уонна Хатыҥ Арыы орто оскуолатын педагогтара оҕолору байыаннай-патриотическай иитиигэ, байыаннай сулууспа сатабылларыгар үөрэтэллэр. Билигин хомуур үһүс сезона үлэлии турар. Оҕолор биэс хонукка араас үөрүйэхтэргэ, дьарыктарга сылдьан аармыйа олоҕун эттэринэн-хааннарынан билэр буолаллар.

Бэҕэһээ Нам улууһун баһылыга Юрий Слепцов, улуустааҕы үөрэх салаатын эбии үөрэхтээһинин салаатын кылаабынай исписэлииһэ Юлия Жергина уонна улуустааҕы үөрэх салаатын матырыйаалынай-тэхиниичэскэй хааччыллыытын салаатын сэбиэдиссэйэ Вячеслав Григорьев хомуур үлэтин-хамнаһын көрдүлэр-иһиттилэр. Оҕолорго анал байыаннай дьайыы кыттыылааҕа кэлэн бойобуой сырыыларын, олоҕун туһунан кэпсээтэ.
Улуус баһылыга хомуур хайдах баран иһэрин көрдө-иһиттэ, оҕолору кытта кэпсэттэ.

Араас саастаах уолаттар хомуурга олус бэркэ сылдьалларын, тото-хана аһыылларын үөрэ-көтө кэпсээтилэр. «Воин» хомуур сиригэр-уотугар уот тардыллыытын боппуруоһа күүскэ турар. Маныаха билигин смета оҥоһуллан, салгыы үлэ ыытыллар. Ону таһынан бу хомууру эһиилгиттэн балаакка лааҕырга кубулутан үлэлэтэр инниттэн эбии тутуулар ыытыллыахтаахтар. Билигин кэпсэтиһии, былааны торумнааһын үлэтэ барар.