Нам улууһун бааһынайдара өймөкөөннөрү  өйүүргэ биир  санааҕа кэллилэр

Бүгүн Нам улууһунааҕы тыа хаһаайыстыбатын управлениетын начаалынньыга Владимир Макаров салайыытынан халаан уутуттан улаханнык эмсэҕэлээбит Өймөкөөн бааһынай хаһаайыстыбаларыгар көмөлөһүү боппуруостарыгар сүбэ мунньах буолан ааста.

Мунньахха бааһынай хаһаайыстыбалар салайааччылара – Бөтүҥтэн Надежда Попова, Аппааныттан Ариан Винокуров, Үөдэйтэн Алла Бережнева, Хатырыктан Александра Слепцова, Түбэттэн Радик Лукин,  улуус бааһынай хаһаайыстыбаларын уонна кэпэрэтииптэрин холбоһугун  салайааччыта Екатерина Стручкова кыттыыны ыллылар.

Маны сэргэ Ил Түмэн дьокутаата, Үөдэйтэн бааһынай хаһаайыстыба салайааччыта, оҕуруотчут Эдгар Константинов, Партизантан Степан Терешкин, Хатырыктан Айсен Парников, Иннокентий Винокуров төлөпүөнүнэн сибээскэ тахсан санааларын үллэһиннилэр диэн Нам улууһун дьаһалтатын пресс-сулууспата иһитиннэрэр.

Мунньах түмүгүнэн, былырыыҥҥы халаан уутугар ынах сүөһүлэрэ, сылгылара ууга былдьанан көмө ылбыт  Нам улууһун хаһаайыстыбалара Саха сирин үтүө санаалаах дьонугар махтанан туран, өймөкөөннөрү  өйүүргэ биир  санааҕа кэллилэр.