Нам улууһун баһылыга Юрий Слепцов халаан уутуттан эмсэҕэлээбит эбийиэктэргэ сырытта

Бу күннэргэ Нам улууһун баһылыга Юрий Слепцов салайар эппиэттээх исписэлиистэрин  бөлөҕө Граф Биэрэгэ, Маймаҕа, Таастаах уонна Түбэ нэһилиэктэригэр сылдьан халаан уутуттан эмсэҕэлээбит эбийиэктэргэ тутуу, өрөмүөн уонна саҥа үөрэх дьылыгар бэлэмнэнии үлэлэр хаамыыларын билистэ.

Граф Биэрэгэр халаан содулуттан эмсэҕэлээбит «Ромашка» оҕо уһуйааныгар сылдьан өрөмүөн үлэтин көрдүлэр. Маймаҕа оскуола-саада халаан содулуттан улаханнык эмсэҕэлээн, оҕолор саҥа эбийиэк тутуллуор диэри нэһилиэк «Кыталык» культурнай- спортивнай киинигэр сылдьыахтара, үөрэниэхтэрэ. Үлэлиир бөлөх бу кииҥҥэ сылдьан, саҥа үөрэх дьылыгар оҕолор үөрэнэр, уһуйааҥҥа сылдьар усулуобуйаларыгар эппиэттиир өрөмүөн, быстах тутуу үлэтэ бара турарын көрдө, оскуола-саад салайааччытын кытта кэпсэттэ.  Таастаахха быйыл үлэҕэ киирэр саҥа культурнай-спортивнай комплексы уонна оҕо уһуйааныгар ыытыллыбыт өрөмүөн үлэтин көрдүлэр. Уһуйаан сэбиэдиссэйэ муоста көннөрүүтүгэр быстах өрөмүөн үлэтэ ыытыллыан наадатын эттэ. Түбэҕэ эргэ оскуоланы көтүрүү үлэтэ барар. Саҥа үөрэх дьылыттан оҕолор хас да сиринэн үөрэниэхтэрэ. Нэһилиэк сынньалаҥ киинигэр физкултуура уруога, эрчиллиилэр ыытыллыахтара. Манна билигин сылаас туалет, канализация оҥоруутун үлэтэ бара турар.

Юрий Иннокентьевич дуогабардаах тутуу тэрилтэлэрэ үөрэх дьыла саҕаланыан иннинэ эбийиэктэри хаачыстыбалаахтык тутан, өрөмүөннээн хамыыһыйаҕа туттаралларыгар, нэһилиэк дьаһалталара уонна үөрэх управлениета үлэни хонтуруолга туталларыгар сорудахтаата. Улуус баһылыга салайааччылаах бөлөҕү нэһилиэк баһылыктара, үөрэх тэрилтэлэрин салайааччылара көрсөн эбийиэктэри көрдөрдүлэр, үлэ хаамыытын билиһиннэрдилэр.

Бу туһунан  «Нам улууһа” МТ пресс-сулууспата улуус дьаһалтатын телеграм-ханаалыгар сырдатта.