Нам улууһун II Хомустааҕар Өрөспүүбүлүкэ күнүн сэргэхтик көрүстүлэр

Нам улууһун II Хомустаах нэһилиэгэр Өрөспүүбүүкэ күнүн сэргэхтик көрүстүлэр. Үгэс быһыытынан бу күн нэһилиэк олохтоохторо  параадтаатылар. Бу туһунан нэһилиэк баһылыга Лев Новгородов санаатын үллэһиннэ:

— Бүгүн өрөспүүбүлүкэбитигэр автономия төрүттэммит суолталаах күнүнэн буолар. Бу өрөспүүбүлүкэбит устуоруйатыгар сүдү суолталаах,  улуу убайдарбыт ытык ааттарыгар сүгүрүйэр бэлиэ күммүт. Биһиги номнуо алтыс сылбытын нэһилиэкпит бары тэрилтэлэрэ, түөлбэлэр буолан бары маннык сэлэлии хаамабыт. Маннык тэрээһиннэр хас биирдии нэһилиэккэ буолуохтарын баҕарабыт, автономияны төрүттэспит ытык дьоммут ааттарын ахтан-санаан ааһыахтаахпыт. Автономияны ылыммыппыт биһиги дьолбут буолар. Ол үтүөтэ билигин аныгы кэмҥэ эппиэттиир оскуолаларбытыгар, уһуйааннарбытыгар сытар. Үөрэх эйгэтигэр, мэдиссиинэ сайдыытыгар барыта сүрүн оруоллаах. Автономия биһиэхэ, саха норуотугар, сайдыыны аҕалбыта.