Нам улууһун нэһилиэктэригэр киинэ саалалара аһыллыахтара

Алтынньы 4 күнүгэр Хамаҕатта, Модут, Хатырык нэһилиэктэрин норуот айымньыларын кииннэригэр уонна Нам сэлиэнньэтин М.К. Аммосов аатынан культура уонна духуобунай сайдыы дыбарыаһыгар киинэ саалаларын үөрүүлээх аһыллыыта буолуоҕа.

Бу туһунан  улуустааҕы культура уонна духуобунай сайдыы управлениетын начальнигын солбуйааччы Александра Новгородова:
— 2022 сылтан Дьокуускай куоракка «Экстра Синема» хампаанньа киинэ проектордарын оҥорон таһаарар, хомуйар сыах үлэтин саҕалаабыта. Бу сыах оҥорон таһаарар проектордарын уратыта диэн — ханнык баҕарар нэһилиэк кулуубугар киинэни көрдөрүөххэ сөп. 
Маннык проектордар биһиги улууспутугар Хатыҥ Арыы нэһилиэгин  «Чороон” уонна 1 Хомустаах нэһилиэгин «Алгыс” норуот айымньыларын кииннэригэр үлэлии тураллар уонна тыа сиригэр саамай табыгастаах, онно ананан оҥоһуллубут тэрил буолар. Кулууп, саала, кириэһилэлэр, интэриниэт баар буолла да, киинэни көрүөххэ сөп, — диэн иһитиннэрдэ.

“Нам улууһа” МТ пресс — сулууспата