Нам улууһун салайааччылара болҕомтолорун култуура эйгэтигэр туһаайдылар

Бу күннэргэ Нам улууһун баһылыга Юрий Слепцов улуус тэрилтэлэрин салайааччыларын, нэһилиэктэр баһылыктарын мунньан, култуура эйгэтин үлэһиттэрин кытта мунньахтаата.

Кэлэр биэс сылга улууска култуура сайдыытыгар тэрилтэлэринэн туох үлэ ыытыллыахтааҕын, былааннарын туһунан улуустааҕы култуура уонна духуобунай сайдыы управлениетын салайааччыта Семен Ядрихинскай билиһиннэрдэ. Манна саҥа эбийиэктэр тутуллууларын, эдэр исписэлиистэри дьиэнэн хааччыйыы, тэрилтэлэр материальнай-тэхиньиичэскэй баазаларын хаҥатыы, сонун бырайыактары, бырагыраамалары олоххо киллэрии о.д.а. араас этии киирдэ.

Улуустааҕы култуура уонна духуобунай сайдыы управлениетын салайааччытын  солбуйааччы Александра Новгородова Нам улууһун култууратын сайдыытын тосхолун  сиһилии ырытта. Ханнык чопчу хайысхаҕа кимнээҕи кытта үлэлиэхтээхтэрин, култуура сайдыытыгар араас тэрилтэлэри тардыы, оҕоттон саҕалаан аҕам саастаахтарга тиийэ талааннаах дьону өйөөһүн, араас бырагыраамаларга, граннарга кыттыһан сайдыы суолун тобулуу туһунан кэпсээтэ.

Баһылык Юрий Слепцов «сөптөөх суолу тутуспуккут»диэн хайҕаата уонна бэйэтин этиилэрин, көрүүлэрин үллэһиннэ. Ол курдук, хас биирдии нэһилиэккэ култуура дьиэтэ тутаах үлэни-хамнаһы сүрүннүүр тэрилтэ быһыытынан үлэлиэхтээх. Нэһилиэк баһылыгын социальнай боппуруостарга солбуйааччытынан култуура киинин үлэһитэ буолуохтаах диэн эттэ. Кэлэр сылтан олохтоох дьаһалталарга бырагыраамаларга, граннарга, бырайыактарга үлэлэһэр анал исписэлиис баар буолуохтааҕын ыйда. «Кини кэтээн көрө олорон, бырайыактары толкуйдаан кытыннаран иһиэхтээх. Хас биирдии олохтоох  култуура өттүнэн сайдыылаах, ситиһиилээх буоларын туһугар бары күүспүтүн түмэн үлэлиэххэ«, — диэн ыҥырда улуус баһылыга.

Бу тэрээһин туһунан «Нам улууһа» МТ пресс-сулууспата дьаһалта тг-ханаалыгар иһитиннэрдэ. Олус туһалаах маннык тэрээһини  атын улуустар холобур ылан, эмиэ тэрийэллэрэ буоллар бэрт буолуо эбит.