Нам улууһун спортсмена Алматы куоракка «Ardager Alany» турнирга чөмпүйүөннээтэ

Ыам ыйын 16-18 күннэригэр Казахстаҥҥа Алматы куоракка аҕам саастаахтарга «Ardager Alany»  тустууга норуоттар икки ардыларынааҕы турнир буолан ааста.

Күрэххэ Арассыыйаттан, Кыргызстантан, Казахстантан, Узбекистантан 35-60 саастаах уопсайа 250 тустуук 5 дивизионынан арахсан бастыыр иһин күөн көрүстэ.

Нам улууһуттан биллиилээх хапсаҕайдьыт, көҥүл тустууга бэтэрээннэргэ Арассыыйа уонна аан дойду чөмпүйүөнэ Александр Румин чаҕылхай ситиһиилэннэ. Кини 130 кг ыйааһыннаахтарга «D» дивизиоҥҥа (50-55 саастаахтар) чөмпүйүөн үрдүк аатын сүктэ. Бастакы киирсиигэ Кыргызстантан Нурлан Аширбаевы 6:0 ахсаанынан эрэллээхтик кыайда, иккис киирсиигэ Казахстантан Тыныс Инбек кыайыыны биһиги бөҕөспүтүгэр быһа биэрдэ.